स्पेनको राजधानी म्याड्रिडलाई दक्षिणी अन्डालुसिया क्षेत्रसँग जोड्ने रेलमार्गमा दुई तीव्रगतिको रेल ठोक्किँदा कम्तीमा १० जनाको मृत्यु भएको छ । रेल सञ्चालक संस्था एडिफले दुर्घटनाबारे जानकारी दिदै स्थानीय समयअनुसार बिहान ९ बजेपछि रेन्फे र इर्यो कम्पनीका रेल ठोक्किएका थिए । दुर्घटनामा इर्यो रेलका दुई डिब्बा लिकबाट खसेका छन्। दुर्घटनाको कारण र घाइतेको सङ्ख्याबारे अनुसन्धान भइरहेको अधिकारीहरूले बताएका छन् । दुर्घटनापछि म्याड्रिड–अन्डालुसिया तीव्रगतिको रेलमार्गमा यातायात रोकिएको छ । उद्धार तथा आपत्कालीन सेवाले यात्रु र घाइतेलाई राख्न नजिकैको उर्दा सहरमा खेलकुद हलसहितका आवश्यक स्थान तयार पारेका छन् । यसअघि जनवरीमा पनि सोही रेल सञ्चालकको तीव्रगतिको रेल दुर्घटना हुँदा ४६ जनाको मृत्यु भएको थियो । उक्त घटनापछि स्पेनमा रेलमार्गको मर्मतसम्भार र सुरक्षामा गरिएको लगानीबारे बहस चर्किएको थियो ।
संखुवासभा चैनपुर नगरपालिका–१, नुनढाकी थर्पुमा मादक पदार्थ सेवन गरी भएको घरायसी विवादमा श्रीमानको कुटपिटबाट ४९ वर्षीया श्रीमती मिङ्माछिकी शेर्पाको मृत्यु भएको छ। प्रहरीका अनुसार कात्तिक ११ गते बिहान करिब ९:०० बजेको समयमा सोही स्थानमा बस्ने ४८ वर्षीय तेम्बा रिन्जे शेर्पाले मादक पदार्थ सेवन गरेर श्रीमती मिङ्माछिकी शेर्पालाई कुटपिट गरेका थिए। कुटपिटबाट गम्भीर घाइते भएकी उनको घटनास्थलमै मृत्यु भएको प्रहरीले जनाएको छ। घटनाको खबर प्राप्त हुनासाथ स्थानीय प्रहरी चौकीबाट खटिएको टोलीले हत्यामा संलग्न श्रीमान् तेम्बा रिन्जे शेर्पालाई नियन्त्रणमा लिइसकेको छ। प्रहरीले आरोपीलाई नियन्त्रणमा लिएर यस घटना सम्बन्धमा थप अनुसन्धान अगाडि बढाइरहेको जनाएको छ।
बंगालको खाडीमा विकसित अर्नब चक्रवात भारतको आन्ध्र प्रदेशको तटीय क्षेत्रमा प्रवेश गरेपछि तीन जनाको मृत्यु भएको छ। चक्रवातका कारण रूख, बिजुलीको पोल ढलेपछि फरक फरक ठाउँमा तीन जनाको मृत्यु भएको भारतीय अखबार हिन्दुस्तान टाइम्सले लेखेको छ। चक्रवातका कारण ३१ घरमा क्षति पुगेको छ भने धेरै ठाउँमा रूख र बिजुलीका पोल ढलेका छन्। सडक अवरुद्ध हुनुका साथै विद्युत् आपूर्ति पनि प्रभावित भएको टाइम्सले लेखेको छ। भारतको राष्ट्रिय विपद् प्रतिकार्य बल (एनडीआरएफ) का महानिरीक्षक नरेन्द्र सिंह बुन्डेलाले बुधबार पत्रकार सम्मेलनमा आन्ध्र प्रदेश चक्रवातबाट सबैभन्दा बढी प्रभावित भएको बताए। ‘आन्ध्र प्रदेशमा रूख ढलेका छन्, विभिन्न प्रकारका ३१ घरमा क्षति पुगेको जानकारी आएको छ र तीन जनाको मृत्यु भएको छ,’ उनले भने। उनका अनुसार प्रारम्भिक विवरणमा ओडिशामा भने चक्रवातको गम्भीर असर देखिएको छैन। भारतीय सञ्चारमाध्यमका अनुसार मृत्यु हुने तीनै जना आन्ध्र प्रदेशका हुन्। पश्चिम गोदावरी जिल्लाको भीमावरममा रूखले थिचेर ४६ वर्षीय चोक्का किशोर कुमारको मृत्यु भएको थियो। उनलाई अस्पताल पुर्याएपछि चिकित्सकले मृत घोषणा गरेका थिए। त्यस्तै, विशाखापट्टनम जिल्लामा खेतको कुलोमाथि ढलेको बिजुलीको तारमा छुँदा ५३ वर्षीय एक पुरुषको मृत्यु भएको थियो। अनाकापल्ली जिल्लाको येल्लामन्चिलीमा भुइँमा लत्रिएको बिजुलीको तारमा टेक्दा ५५ वर्षीया महिलाको मृत्यु भएको प्रहरीले जनाएको छ। चक्रवातले आन्ध्र प्रदेशका तटीय क्षेत्रमा ठूलो क्षति पुर्याएको छ। काकिनाडा क्षेत्रमा धेरै रूख र बिजुलीका पोल ढलेका छन्। समुद्री छाल र तटीय कटानका कारण उप्पाडा सडक पनि क्षतिग्रस्त भएको भारतीय सञ्चारमाध्यमहरूले जनाएका छन्। विशाखापट्टनमका विभिन्न ठाउँमा पानी जमेको छ भने रूख ढलेपछि केही सडक अवरुद्ध भएका छन्। विद्युत् सेवा पनि प्रभावित भएको छ। भारतीय मौसम विभागका अनुसार चक्रवात बुधबार बिहान आन्ध्र प्रदेशको काकिनाडा र केन्द्रशासित प्रदेश पुदुचेरीको यानमबीचको तटीय क्षेत्रबाट जमिनमा प्रवेश गरेको थियो। तट पार गर्ने क्रममा हावाको गति प्रतिघण्टा १२५ देखि १३५ किलोमिटर पुगेको थियो भने झोक्कासहितको गति १५० किलोमिटरसम्म पुगेको थियो। जमिनमा प्रवेश गरेपछि चक्रवात कमजोर हुँदै गएको पनि हिन्दुस्तान टाइम्सले जनाएको छ। चक्रवातसँगै भएको भारी वर्षाका कारण अनाकापल्ली र विशाखापट्टनम जिल्लाका केही ठाउँमा २०० मिलिमिटरभन्दा बढी पानी परेको छ। चक्रवात कमजोर भए पनि आन्ध्र प्रदेशका विभिन्न क्षेत्रमा अझै भारी वर्षा हुन सक्ने मौसम विभागले जनाएको छ। त्यसैले उद्धार र राहत टोलीलाई थप क्षति हुन नदिन सतर्क रहन भनिएको छ। आन्ध्र प्रदेश सरकारले ढलेका रूख हटाउने, सडक खुलाउने र विद्युत् सेवा पुनः सञ्चालन गर्ने काम गरिरहेको छ। प्रभावित क्षेत्रमा उद्धार तथा राहत टोली परिचालन गरिएका छन्। सुरक्षित स्थानमा राखिएका मानिसलाई खाना, पिउने पानी र स्वास्थ्य सेवा उपलब्ध गराउने काम पनि भइरहेको छ। चक्रवातको सम्भावित असरलाई ध्यानमा राख्दै छिमेकी ओडिशामा पनि सतर्कता अपनाइएको छ। त्यहाँ ३० हजारभन्दा बढी मानिसलाई सुरक्षित स्थानमा सारिएको भारतीय सञ्चारमाध्यमले जनाएका छन्। एनडीआरएफका टोली आन्ध्र प्रदेश, ओडिशा र आसपासका क्षेत्रमा उद्धार तथा राहतका लागि तयारी अवस्थामा राखिएका छन्। चक्रवातका कारण हवाई र रेल सेवा पनि प्रभावित भएका छन्। आन्ध्र प्रदेशका तटीय क्षेत्रका विमानस्थलमा केही उडान रद्द भएका छन् भने विभिन्न रेल सेवा पनि रोकिएका छन्। अधिकारीहरूले मौसमको अवस्था हेरेर यातायात र विद्युत् सेवा सामान्य बनाउने काम गरिरहेका छन्।
सुर्खेत । सुर्खेतका विभिन्न जंगलबाट प्रहरीले १८ नाल बेवारिसे भरुवा बन्दुक बरामद गरेको छ। जिल्लाका चौकुने र बराहाताल गाउँपालिकाका छुट्टाछुट्टै स्थानमा लुकाइछिपाइ राखिएको अवस्थामा प्रहरीले बन्दुक फेला पारेको हो। इलाका प्रहरी कार्यालय बाबियाचौरका प्रहरी निरीक्षक भुपेन्द्र शाहीको कमाण्डमा मातहतको इलाका प्रहरी कार्यालय गुटुसमेतबाट खटिएको संयुक्त प्रहरी टोलीले चौकुने गाउँपालिका–७ सान्नेघारीस्थित जंगलबाट पाँच नाल भरुवा बन्दुक बरामद गरेको छ। त्यसैगरी, अस्थायी प्रहरी चौकी लगामबाट खटिएको टोलीले चौकुने गाउँपालिका–१ धामिसेनस्थित जंगलबाट १२ नाल र प्रहरी चौकी रानिघाटको टोलीले बराहाताल गाउँपालिका–१ ज्यामिरेस्थित जंगलबाट एक नाल भरुवा बन्दुक बरामद गरेको हो। प्रहरीका अनुसार तीनवटै स्थानबाट बरामद गरिएका बन्दुक कानुनी प्रक्रियाअनुसार नियन्त्रणमा लिइएको छ। ती हतियार कसले र कुन प्रयोजनका लागि जंगलमा लुकाएर राखेको थियो भन्ने विषयमा थप अनुसन्धान भइरहेको प्रहरीले जनाएको छ।
सुर्खेत । दसैँ, तिहार, नेपाल संवत् र छठपर्वलाई लक्षित गर्दै कर्णाली प्रदेशका १० वटै जिल्लामा पाँच हजार ३१४ प्रहरी परिचालन गरिने भएको छ। कर्णाली प्रदेश प्रहरी कार्यालय सुर्खेतले चाडपर्वका बेला हुन सक्ने आपराधिक गतिविधि नियन्त्रण, नागरिकको सुरक्षा र सवारी दुर्घटना न्यूनीकरण गर्ने उद्देश्यले चाडपर्व लक्षित सुरक्षा योजना, २०८३ तयार गरेको हो। उक्त योजना असोज २५ गतेदेखि कात्तिक ३० गतेसम्म लागू हुनेछ। प्रदेश प्रहरी कार्यालयका प्रमुख प्रहरी नायब महानिरीक्षक जयराज सापकोटाका अनुसार सुरक्षा योजना कार्यान्वयनका लागि मोबाइल गस्ती, मोटरसाइकल गस्ती, पैदल गस्ती, द्रुतप्रतिकार्य टोली तथा लामो र छोटो दूरीका गस्ती परिचालन गरिनेछ। त्यसैगरी, विशेष तथा आकस्मिक चेकजाँच, ट्राफिकसहितको संयुक्त चेकिङ, धार्मिक तथा पर्यटकीयस्थलको सुरक्षा र यात्रु सहायता कक्ष सञ्चालन गरिनेछ। चाडपर्वका समयमा हुन सक्ने झैझगडा, हुलदङ्गा, ठगी, कालोबजारी, कृत्रिम अभाव र मूल्यवृद्धि नियन्त्रण गर्नुका साथै सार्वजनिकस्थल तथा मेलापर्वमा सुरक्षा व्यवस्था कडा बनाइने प्रहरीले जनाएको छ। नागरिकले भयमुक्त वातावरणमा चाडपर्व मनाउन सकून् भन्ने उद्देश्यले सुरक्षा योजना लागू गर्न लागिएको प्रहरी नायब महानिरीक्षक सापकोटाले बताए।
काठमाडौं । सम्पत्ति शुद्धीकरण अनुसन्धान विभागले पूर्वप्रधानन्यायाधीश चोलेन्द्र शमशेर जबरासहित उनका आफन्त तथा निकटस्थ व्यक्तिहरूको घरमा छापा मारेको छ। विभागको टोलीले जबरासहित नवराज थपलिया, दीपक तिमल्सिना र नारायण दाहालको घरमा छापा मारेको स्रोतले जनाएको छ। यस्तै, जबराका भाइ प्रभुशमशेर जबरा र ज्वाइँ नाता पर्ने नवीन बस्नेतको घरमा समेत छापा मारिएको बताइएको छ। छापाका क्रममा जबरा निकटस्थ व्यक्तिका घरबाट महत्त्वपूर्ण कागजात बरामद भएको स्रोतको दाबी छ। केही दिनअघि काठमाडौं उपत्यका अपराध अनुसन्धान कार्यालयको टोलीले जबरालाई निवासबाट पक्राउ गरी करिब १२ घण्टा नियन्त्रणमा लिएर छाडेको थियो।
काठमाडौँ उपत्यका अपराध अनुसन्धान कार्यालयले वैदेशिक रोजगारीका लागि दक्षिण कोरिया पठाउने प्रलोभन देखाइ ठगी गरेको अभियोगमा ‘न्यु सफल ग्लोबल कन्सल्टेन्सी’का सञ्चालकलाई पक्राउ गरेको छ। पक्राउ पर्नेमा नुवाकोट जिल्ला बेलकोटगढी नगरपालिका–११ स्थायी ठेगाना भइ हाल काठमाडौँ महानगरपालिका–२६ सामाखुसी बस्ने २८ वर्षीय गणेश पाण्डे रहेका छन्। कन्सल्टेन्सीले आफ्नो छोरालाई कोरिया पठाउने भन्दै रकम लिएर २ वर्षदेखि अलपत्र पारेको भन्दै एक महिलाले सामाजिक सञ्जाल टिकटकमा भिडियो सार्वजनिक गरेकी थिइन्। उक्त भिडियोमार्फत उनले कारबाहीका लागि प्रधानमन्त्री र गृहमन्त्रीसमक्ष माग गरेकी थिइन्। भिडियो सार्वजनिक भएपछि अनुसन्धानमा खटिएको प्रहरी टोलीले पाण्डेलाई २०८३ असोज २० गते काठमाडौँको रानीबारी चोकबाट नियन्त्रणमा लिएको हो। प्रहरीका अनुसार पक्राउ परेका पाण्डेमाथि ठगी सम्बन्धी कसूरमा आवश्यक अनुसन्धान भइरहेको छ।
नेपाल प्रहरीको केन्द्रीय अनुसन्धान ब्यूरो (सिआईबी) ले काठमाडौं महानगरपालिका–१३ का वडाध्यक्ष ध्रुर्वनारायण मानन्धरसँग सोधपुछ गरेको छ । ठगी कसुरमा सिआइबीले उनीसँग अघिल्लो साताको बिहिबार सोधपुछ गरेको हो । स्रोतका अनुसार उनलाई वडा कार्यालयबाट सिआइबीको टोलीले लगेको थियो । ‘सिआइबीको टोली बिहिबार कार्यालय आएको थियो । अनि उहाँलाई सोधपुछको लागि भन्दै लिएर गयो’,स्रोतले भन्यो । वडाका छैठौं तहका अधिकृत सुजनकुमार झाका अनुसार वडाध्यक्ष कार्यालय आएका छैनन् । ‘उहाँ बिरामी हुनुहुन्छ,त्यसैले वडा आउनुभएको छैन’,उनले भने । सिआइबीका प्रवक्ता प्रहरी वरिष्ठ उपरीक्षक (एसएसपी) अनुपसमशेर जबराले उनलाई सोधपुछका लागि ल्याइएको पुष्टि गरे । ठगी कसुरमा सोधपुछ गरिएको र त्यसपछि परिवारको जिम्मा लगाइएको उनले बताए । जनआस्थासँग भने,‘उहाँलाई ठगी कसुरमा सोधपुछ गर्न ल्याइएको थियो । सोधपुछ गरेर परिवारको जिम्मा लगाइसकेका छौं ।’ जनआस्थाले सोबारे बुझ्नका निम्ति वडाध्यक्ष मानन्धरलाई पनि सम्पर्क गरेकोमा हुन सकेन । वडाका छैठौं तहका अधिकृत सुजनकुमार झाका अनुसार वडाध्यक्ष कार्यालय आएका छैनन् । ‘उहाँ बिरामी हुनुहुन्छ,त्यसैले वडा आउनुभएको छैन’,उनले भने । वडाध्यक्षलाई सिआइबीले लगेकोबारे आफूलाई जानकारी नरहेको उनले बताए ।
