झापाको भद्रपुरमा सामान्य विवाद हुँदा दाजुले आफ्नै भाइलाई छुरा प्रहार गरी घाइते बनाएका छन् । भद्रपुर नगरपालिका–५ सुन्दरबस्तीमा गएराति ३२ वर्षीय कुबराज हस्दाले आफ्नै ३० वर्षीय भाइ बाबुलाल हस्दामाथि छुरा प्रहार गरेको जिल्ला प्रहरी कार्यालय झापाले जनाएको छ । जिल्ला प्रहरी कार्यालय झापाका निमित्त सूचना अधिकारी तथा प्रहरी निरीक्षक मुन्नाकुमार अधिकारीका अनुसार सामान्य विषयमा दुई दाजुभाइबीच विवाद हुँदा भाइ बाबुलालमाथि छुरा प्रहार गरेका हुन् । छुरा प्रहारबाट घाँटीमा चोट लगेको भाइको प्रादेशिक अस्पताल भद्रपुरमा उपचार भइरहेको प्रहरीले जनाएको छ । घटनापछि प्रहरीले घटनास्थलबाट छुरा बरामद गरेको छ । घटनालगत्तै फरार भएका कुबराजलाई आज प्रहरीले नियन्त्रणमा लिएको छ ।
दैलेखको भगवतीमाई गाउँपालिकामा दुई जना बालिका मृत अवस्थामा फेला परेका छन्। गाउँपालिकाको वडा नम्बर ४ स्थित मनघर भन्ने स्थान नजिकैको जङ्गलमा १३ र १४ वर्षीया दुई बालिका एकै ठाउँमा मृत भेटिएका हुन्। जिल्ला प्रहरी कार्यालय दैलेखका अनुसार मृतक बालिकाहरू आपसमा मामा-फुपूका छोरीहरू (दिदी-बहिनी) हुन्। गएराति एउटै घरमा रहेका उनीहरू कतिबेला बाहिर निस्किए भन्ने खुल्न सकेको छैन। बिहान घरभन्दा केही टाढा रहेको जङ्गलमा दुवै जनाको शव एकै ठाउँमा भेटिएको हो। जिल्ला प्रहरी कार्यालय दैलेखका सूचना अधिकारी पुष्पराज रोकायका अनुसार घटनाबारे विस्तृत जानकारी लिन र सत्यतथ्य पत्ता लगाउन प्रहरी टोली परिचालन गरी सूक्ष्म अनुसन्धान भइरहेको छ। घटनाको प्रकृति र मृत्युको कारणबारे थप विवरण आउन बाँकी रहेको प्रहरीले जनाएको छ।
उदयपुरको त्रियुगा नगरपालिका–११ स्थित सङ्गम टोलमा सवारी साधनको ठक्करबाट एक पैदलयात्रीको मृत्यु भएको छ। शनिबार बेलुकी त्रियुगा–११ को सङ्गम टोलस्थित इनार चोकबाट पिपलचोकतर्फ जाँदै गरेको प्रदेश ३–०२–०१२ प ४८२२ नम्बरको स्कुटरले पैदल हिँडिरहेका रामबहादुर कार्कीलाई ठक्कर दिएको थियो। स्कुटरको ठक्करबाट गम्भीर घाइते भएका कार्कीलाई उपचारका लागि जिल्ला अस्पताल पुर्याइएलगत्तै चिकित्सकले मृत घोषणा गरेका थिए। जिल्ला प्रहरी प्रमुख प्रहरी उपरीक्षक राजन चापागाईका अनुसार अस्पताल ल्याउनासाथ उनलाई चिकित्सकले मृत घोषणा गरेका हुन्। दुर्घटनापछि प्रहरीले ठक्कर दिने स्कुटर र त्यसका चालक त्रियुगा–११, ढिम्की निवासी दिलीप केसीलाई नियन्त्रणमा लिएर थप अनुसन्धान अगाडि बढाएको जनाएको छ।
नेपाल प्रहरीको केन्द्रीय अनुसन्धान ब्यूरो (सिआईबी) ले काठमाडौं महानगरपालिका–१३ का वडाध्यक्ष ध्रुर्वनारायण मानन्धरसँग सोधपुछ गरेको छ । ठगी कसुरमा सिआइबीले उनीसँग अघिल्लो साताको बिहिबार सोधपुछ गरेको हो । स्रोतका अनुसार उनलाई वडा कार्यालयबाट सिआइबीको टोलीले लगेको थियो । ‘सिआइबीको टोली बिहिबार कार्यालय आएको थियो । अनि उहाँलाई सोधपुछको लागि भन्दै लिएर गयो’,स्रोतले भन्यो । वडाका छैठौं तहका अधिकृत सुजनकुमार झाका अनुसार वडाध्यक्ष कार्यालय आएका छैनन् । ‘उहाँ बिरामी हुनुहुन्छ,त्यसैले वडा आउनुभएको छैन’,उनले भने । सिआइबीका प्रवक्ता प्रहरी वरिष्ठ उपरीक्षक (एसएसपी) अनुपसमशेर जबराले उनलाई सोधपुछका लागि ल्याइएको पुष्टि गरे । ठगी कसुरमा सोधपुछ गरिएको र त्यसपछि परिवारको जिम्मा लगाइएको उनले बताए । जनआस्थासँग भने,‘उहाँलाई ठगी कसुरमा सोधपुछ गर्न ल्याइएको थियो । सोधपुछ गरेर परिवारको जिम्मा लगाइसकेका छौं ।’ जनआस्थाले सोबारे बुझ्नका निम्ति वडाध्यक्ष मानन्धरलाई पनि सम्पर्क गरेकोमा हुन सकेन । वडाका छैठौं तहका अधिकृत सुजनकुमार झाका अनुसार वडाध्यक्ष कार्यालय आएका छैनन् । ‘उहाँ बिरामी हुनुहुन्छ,त्यसैले वडा आउनुभएको छैन’,उनले भने । वडाध्यक्षलाई सिआइबीले लगेकोबारे आफूलाई जानकारी नरहेको उनले बताए ।
भोजपुर, २० असोज । भोजपुरको हतुवागढी गाउँपालिकाबाट ठूलो परिमाणको लागुऔषध गाँजासहित एक युवकलाई प्रहरीले नियन्त्रणमा लिएको छ। हतुवागढी गाउँपालिका–९ स्थित धिरिङ खोलाको बगरबाट २४४ किलो ७७० ग्राम (६ बोरा) गाँजासहित आमचोक गाउँपालिका–७ बस्ने १९ वर्षीय एकराज मगर पक्राउ परेका हुन्। मंगलबार बिहान ३:३० बजेको समयमा गस्तीमा खटिएको प्रहरी टोलीले शंकास्पद अवस्थामा भेटिएका मगरलाई नियन्त्रणमा लिएको हो। प्रहरीले उनको साथबाट गाँजाका साथै को. प्र. ०१–०२–०४६ प ८६५१ नम्बरको मोटरसाइकल र एक थान मोबाइल समेत बरामद गरेको छ। बरामद गरिएको गाँजा र मोटरसाइकलसहित नियन्त्रणमा लिइएका युवकमाथि थप अनुसन्धान भइरहेको जिल्ला प्रहरी कार्यालय भोजपुरले जनाएको छ।
विभिन्न जिल्लामा स्वबासी, भूमिहीन दलित, भूमिहीन सुकुम्बासी र अव्यवस्थित बसोबासी गरी ५ हजार ७३७ परिवारलाई जग्गाधनी दर्ता प्रमाणपुर्जा वितरण भइसकेको प्रधानमन्त्री वालेन्द्र शाहले हिजो बेलुका सामाजिक सञ्जाल फेसबुकमार्फत जानकारी गराउनुभएको हो । भूमिहीन, सुकुम्बासी तथा अव्यवस्थित बसोबासीको समस्या समाधानलाई सरकारले प्राथमिकतामा राखेको र अहिलेसम्म ५ हजार ७३७ परिवारलाई लालपुर्जा वितरणको काम भइसकेको उहाँले उल्लेख गर्नुभएको छ । भूमि समस्या समाधान समितिमार्फत देशभरका तथ्यांक एकीकृत रूपमा संकलन तथा प्रशोधन भइरहेको र अहिलेसम्म प्रणालीमा १३ लाख ११ हजार १९७ निवेदन प्रविष्ट भइसकेका छन् । ती निवेदनको अध्ययन र प्रमाणीकरणको काम भइरहेको सरकारले जनाएको छ । सार्वजनिक महत्वका क्षेत्र तथा जोखिमयुक्त ठाउँमा बसेका भूमिहीनलाई सुरक्षित ठाउँमा व्यवस्थापन गर्ने प्रक्रिया पनि अघि बढाइएको छ । काठमाण्डौ उपत्यकाबाट विस्थापित परिवारलाई उनीहरूको स्थायी ठेगाना भएको जिल्लामै भूमि व्यवस्थापन गर्ने तयारी गरिएको प्रधानमन्त्री शाहले बताउनुभएको छ । भूमिहीन भएको झुटो विवरण दिनेहरूको अभिलेख हेरेर आवश्यक कानुनी कारबाही अघि बढाइएको समेत सरकारले जनाएको छ । भूमि सम्बन्धी ऐन, वन ऐनलगायत कानुनमा आवश्यक सुधार गरी प्रक्रिया थप सहज बनाउने तयारीसमेत भइरहेको छ । सरकारले चुनावअघि गरेको प्रतिबद्धताअनुसार १ हजार दिनभित्र भूमिहीन सुकुम्बासीको समस्या समाधान गर्ने लक्ष्य लिएको जनाएको छ। जिल्ला–जिल्लामा समस्या समाधान गर्दै क्रमशः सुकुम्बासी समस्यामुक्त जिल्ला घोषणा गर्ने कार्यदिशा रहेको प्रधानमन्त्री शाहले उल्लेख गर्नुभएको छ ।
वीरेन्द्रनगर, सुर्खेत – विश्व लगानीकर्ता सप्ताह २०२६ को अवसरमा सुर्खेतमा वित्तीय साक्षरता अभिवृद्धि तथा लगानीकर्ता सचेतना जगाउने उद्देश्यले प्रभातफेरी कार्यक्रमको आयोजना गरिएको छ। नेपाल स्टक ब्रोकर एसोसिएसन र इम्पेरिएल सेक्युरिटिज कम्पनी लिमिटेडको आयोजना तथा नेपाल धितोपत्र बोर्डको पहलमा काठमाडौँ उपत्यका बाहिरका विराटनगर, पोखरा र सुर्खेतमा एकैसाथ यो कार्यक्रम सम्पन्न भएको हो। विश्व धितोपत्र नियामक संगठन (IOSCO) को पहलमा सन् २०१७ देखि सुरु भएको विश्व लगानीकर्ता सप्ताह नेपालमा पनि धितोपत्र बोर्डको नेतृत्वमा प्रत्येक वर्ष मनाइँदै आइएको छ। यस अभियानको मुख्य उद्देश्य लगानीकर्तालाई पूँजी बजारका जोखिमबारे सचेत गराउँदै सुसूचित, विवेकपूर्ण र जिम्मेवार लगानी निर्णय गर्न प्रोत्साहित गर्नु रहेको छ। कार्यक्रममा सुर्खेत उद्योग वाणिज्य संघका अध्यक्ष हर्षविक्रम खड्का, नेपाल धितोपत्र बोर्डका कार्यकारी निर्देशक मुक्तिनाथ श्रेष्ठ, निर्देशक अम्बिका प्रसाद गिरी, बोर्डका अधिकृत राजुबहादुर जी.सी., उद्योग वाणिज्य संघका पदाधिकारीहरू, विभिन्न बैंक, वित्तीय संस्था, बीमा कम्पनीका प्रतिनिधि, लगानीकर्ता, विद्यार्थी तथा पत्रकारहरूको उपस्थिति रहेको थियो। कार्यक्रममा बोल्दै आयोजक संस्थाका तर्फबाट पछिल्लो समय पूँजी बजारप्रति युवा तथा नयाँ लगानीकर्ताहरूको आकर्षण बढे पनि लगानीसँगै जोखिमको ज्ञान, सही सूचना र जिम्मेवार लगानी व्यवहार आवश्यक रहेको औंल्याइयो। पूँजी बजारलाई पारदर्शी, व्यवस्थित, विश्वसनीय र लगानीमैत्री बनाउन सरोकारवाला निकायहरूसँग सहकार्य गर्दै अघि बढ्ने प्रतिबद्धता समेत व्यक्त गरियो। कर्णाली प्रदेशलाई उच्च प्राथमिकतामा राख्दै इम्पेरिएल सेक्युरिटिजले वि.सं. २०७६ देखि सुर्खेत क्षेत्रमा शेयर कारोबार तथा डिम्याट सेवा उपलब्ध गराउनुका साथै निरन्तर वित्तीय साक्षरता कार्यक्रम सञ्चालन गर्दै आएको जानकारी गराइएको छ।
सल्यान — हावाहुरीले ढालेका बिजुलीका पोल र चुडिएका तार समयमै मर्मत हुन नसक्दा सल्यानका दुई पालिकाका तीन वडाका दर्जनौँ बस्ती १० दिनदेखि अन्धकारमा छन्। गत असोज १० गते साँझ आएको भीषण हावाहुरीले कपुरकोट गाउँपालिका–५ र ६ तथा शारदा नगरपालिका–१० का विभिन्न ठाउँमा विद्युत्का पोल ढाल्नुका साथै तार चुँडाएको थियो। विद्युत् सेवा अवरुद्ध हुँदा १ हजार १ सय ७० घरधुरी प्रभावित भएका छन्। विद्युत् नहुँदा खानेपानी, सञ्चार, स्वास्थ्य, शिक्षा तथा वडा कार्यालयबाट प्रवाह हुने सेवासमेत प्रभावित भएका छन्। मोबाइल चार्ज गर्नसमेत समस्या भएपछि स्थानीय राति सौर्य टुकी, लालटिन र झर्रोको भर पर्न बाध्य छन्। कपुरकोट–५ का करिब ३ सय, वडा नम्बर ६ का ७ सय ५० र शारदा–१० का १ सय २० घरधुरी विद्युत् सेवाबाट वञ्चित रहेको जनाइएको छ।
