सुर्खेत। सुर्खेतको वीरेन्द्रनगर नगरपालिका–१० का वडा सदस्य मनोहरलाल आचार्यले मङ्सिर १ गतेदेखि लागू हुने गरी पदबाट राजीनामा दिएका छन्। विकास निर्माणका विभिन्न योजनामा काम गर्ने क्रममा अनेकौँ बहानामा अवरोध सिर्जना भएकाले कार्यसम्पादन गर्न कठिन भएको भन्दै उनले राजीनामा दिएको जनाएका छन्।
काठमाडौं । सम्पत्ति शुद्धीकरण अनुसन्धान विभागले पूर्वप्रधानन्यायाधीश चोलेन्द्र शमशेर जबरासहित उनका आफन्त तथा निकटस्थ व्यक्तिहरूको घरमा छापा मारेको छ। विभागको टोलीले जबरासहित नवराज थपलिया, दीपक तिमल्सिना र नारायण दाहालको घरमा छापा मारेको स्रोतले जनाएको छ। यस्तै, जबराका भाइ प्रभुशमशेर जबरा र ज्वाइँ नाता पर्ने नवीन बस्नेतको घरमा समेत छापा मारिएको बताइएको छ। छापाका क्रममा जबरा निकटस्थ व्यक्तिका घरबाट महत्त्वपूर्ण कागजात बरामद भएको स्रोतको दाबी छ। केही दिनअघि काठमाडौं उपत्यका अपराध अनुसन्धान कार्यालयको टोलीले जबरालाई निवासबाट पक्राउ गरी करिब १२ घण्टा नियन्त्रणमा लिएर छाडेको थियो।
सुर्खेत। कर्णाली प्रदेश सरकारको मुख्य न्यायाधिवक्तामा दैलेखका अधिवक्ता सर्वराज जोशी नियुक्त भएका छन्। प्रदेश सरकारको सिफारिसमा उनलाई मुख्य न्यायाधिवक्तामा नियुक्त गरिएको हो। नवनियुक्त मुख्य न्यायाधिवक्ता जोशीले सोमबार पद तथा गोपनीयताको शपथ ग्रहण गरेका छन्। शपथ ग्रहण कार्यक्रममा उच्च अदालत सुर्खेतका मुख्य न्यायाधीश हरिप्रसाद भण्डारी, प्रदेश प्रमुख यज्ञराज जोशी, मुख्यमन्त्री मंगलबहादुर शाही, सभामुख नन्दा गुरुङलगायत प्रदेश सरकारका अधिकारी, कानुन व्यवसायी तथा अन्य विशिष्ट व्यक्तिको उपस्थिति थियो। नेपालको संविधानअनुसार मुख्य न्यायाधिवक्ता प्रदेश सरकारको प्रमुख कानुनी सल्लाहकार हुन्। उनले प्रदेश सरकारलाई कानुनी राय–सल्लाह दिनुका साथै सरकारका तर्फबाट अदालतमा प्रतिनिधित्व गर्ने व्यवस्था छ। शपथपछि जोशीले संविधान र प्रचलित कानुनबमोजिम आफ्नो जिम्मेवारी निर्वाह गर्ने प्रतिबद्धता व्यक्त गरे।
काठमाडौं । राष्ट्रिय स्वतन्त्र पार्टी (रास्वपा) को केन्द्रीय समिति बैठक जुम्लाको अर्गानिक स्याउ बाँडेर सुरु भएको छ। बिहीबार वनस्थलीस्थित पार्टी कार्यालयमा सभापति रवि लामिछानेले केन्द्रीय सदस्यहरूलाई स्याउ वितरण गर्दै बैठकको सुरुवात गरेका हुन्। सभापति लामिछानेको अध्यक्षतामा बसेको बैठकमा आगामी राजनीतिक अभियान, स्थानीय तहको निर्वाचन, संगठन विस्तार तथा समसामयिक राजनीतिक विषयमा छलफल भइरहेको पार्टीका प्रवक्ता जगदीश खरेलले जानकारी दिएका छन्। बैठकमा आसन्न स्थानीय तहको निर्वाचनलाई लक्षित गर्दै केन्द्रीय उम्मेदवार छनोट समितिका सदस्य मनोनयन गर्ने, विभिन्न विभागलाई पूर्णता दिन विभागीय प्रमुख तथा उपप्रमुख नियुक्त गर्ने विषय एजेन्डामा छन्। त्यस्तै, रास्वपाले देशव्यापी रूपमा सञ्चालन गर्ने ‘हामी आउँदै छौँ’ अभियानको मोडालिटीबारे पनि बैठकमा छलफल हुँदैछ। बैठकमा मधेस प्रदेश संगठनको अडिट रिपोर्ट प्रस्तुत गर्नुका साथै समसामयिक राजनीतिक घटनाक्रम र विविध विषयमा समेत छलफल भइरहेको जनाइएको छ।