सुर्खेत, साउन १० — एमाले अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’बीच शनिबार भएको राष्ट्रिय सहमतिसँगै कर्णाली प्रदेशको सत्ता समीकरण फेरिएको छ। नयाँ सहमतिअनुसार कर्णालीमा नेकपाको नेतृत्वमा नयाँ सरकार बन्ने भएको हो।

यसअघि कांग्रेसले असार ३१ गते सरकारलाई दिएको समर्थन फिर्ता लिएपछि मुख्यमन्त्री यामलाल कँडेल नेतृत्वको सरकार अल्पमतमा परेको थियो। त्यसपछि कांग्रेस र नेकपाले कँडेलविरुद्ध अविश्वास प्रस्ताव दर्ता गरेका थिए।

प्रदेशसभा बैठकलाई सम्बोधन गर्दै मुख्यमन्त्री कँडेलले शनिबार पदबाट राजीनामा दिएसँगै नयाँ सरकार गठनको प्रक्रिया औपचारिक रूपमा सुरु भएको छ। ४० सदस्यीय प्रदेशसभामा सरकार गठनका लागि २१ सांसदको समर्थन आवश्यक पर्छ।

प्रदेशसभामा हाल नेपाली कांग्रेसका १५, नेकपाका १३, एमालेका १० (सभामुखसहित) तथा राप्रपा र एक स्वतन्त्र सांसद छन्। नयाँ राष्ट्रिय सहमतिपछि कर्णालीमा नेकपाको नेतृत्वमा सरकार गठन हुने निश्चित भएको छ।