काठमाडौं, भारतको उत्तराखण्डस्थित हरिद्वारको जगजीतपुर क्षेत्रमा रहेको एक घरको खानेपानी ट्याङ्कीमा २७ वटा सर्पका बच्चा फेला परेका छन्। सोमबार ट्याङ्की सफा गर्ने क्रममा घरधनीले सर्पका बच्चा देखेपछि वन विभाग र सर्प उद्धार टोलीलाई खबर गरेका थिए। त्यसपछि पुगेको टोलीले करिब एक घण्टाको प्रयासपछि सबै सर्पलाई सकुशल उद्धार गरेको जनाएको छ। उद्धार गरिएका सर्पहरू ‘चेकर्ड कीलब्याक’ अर्थात् पानी सर्प प्रजातिका रहेको र ती विषालु नभएको विशेषज्ञहरूले बताएका छन्। गर्मी मौसममा सुरक्षित तथा ओसिलो स्थान खोज्दै माउ सर्पले ट्याङ्कीमा फुल पारेको हुनसक्ने अनुमान गरिएको छ। उद्धारपछि सबै सर्पका बच्चालाई बस्तीभन्दा टाढाको प्राकृतिक वन क्षेत्रमा सुरक्षित रूपमा छाडिएको जनाइएको छ। घटना पछि स्थानीयमा केही समय त्रास फैलिएको थियो।
डेाल्पा । कर्णाली प्रदेश सरकारले शिक्षा क्षेत्रमा उत्कृष्ट कार्यसम्पादन गर्दै गुणस्तरीय शिक्षाको प्रवर्द्धनमा उल्लेखनीय योगदान पुर्याएका डोल्पाका तीन जना शिक्षकलाई नगद पुरस्कारसहित सम्मान गरेको छ । सामाजिक विकास मन्त्रालय अन्तर्गतको शिक्षा विकास निर्देशनालय, सुर्खेतले आर्थिक वर्ष २०८२/८३ को स्वीकृत कार्यक्रमअनुसार उनीहरूलाई उत्कृष्ट छनोट गरेको हो । सम्मानित हुनेहरूमा जगदुल्ला गाउँपालिका–२ स्थित त्रिपुरा साधारण तथा प्राविधिक माविका प्रधानाध्यापक जयबहादुर बस्नेत, मुड्केचुला गाउँपालिका–६ का मालिका माविका शिक्षक दामोदर ज्ञवाली र त्रिपुरासुन्दरी नगरपालिका–१० स्थित जनप्रभा साधारण तथा प्राविधिक माविकी शिक्षिका बुद्धा पहाडी हुनुहुन्छ । निर्देशनालयले उत्कृष्ट घोषित तीनै जना शिक्षकलाई जनही ३५ हजार रुपैयाँ नगद पुरस्कार र प्रशंसापत्र प्रदान गरेको छ । शिक्षकहरूको मूल्यांकन शिक्षण पेशामा समर्पण, विद्यालय व्यवस्थापन, विद्यार्थीको शैक्षिक उपलब्धि सुधार तथा समुदायसँगको सहकार्यका आधारमा गरिएको थियो । सम्मानित शिक्षकहरूले प्रदेश सरकारबाट प्राप्त यस सम्मानले आफ्नो कार्यप्रति थप जिम्मेवारी र उत्साह थपेको बताउँदै आगामी दिनमा अझ मेहनतका साथ विद्यार्थीको भविष्य निर्माणमा लाग्ने प्रतिबद्धता व्यक्त गर्नुभएको छ । भौगोलिक विकटता र सीमित स्रोतसाधनका बीच पनि दुर्गम क्षेत्रमा कार्यरत शिक्षकहरूलाई प्रोत्साहन गर्नु यस कार्यक्रमको मुख्य उद्देश्य रहेको शिक्षा विकास निर्देशनालयले जनाएको छ । यस्ता सम्मानले शिक्षण पेशाको मर्यादा बढाउनुका साथै शिक्षा क्षेत्रमा सकारात्मक प्रतिस्पर्धा सिर्जना गरी विद्यालय शिक्षाको समग्र गुणस्तर अभिवृद्धिमा टेवा पुग्ने विश्वास गरिएको छ ।
काठमाडौँ। हाल नेपालको उपल्लो वायुमण्डलमा पश्चिमी न्यून चापीय रेखा तथा स्थानीय वायुको आंशिक प्रभाव रहेको छ। यसकै प्रभावका कारण देशका विभिन्न भागमा अहिले मिश्रित मौसम देखिएको छ। अहिले लुम्बिनी, कर्णाली र सुदूरपश्चिम प्रदेश लगायत देशका अधिकांश हिमाली तथा पहाडी भूभागमा साधारणतया बादल लागेको छ। बागमती र गण्डकी प्रदेशको पहाडी र हिमाली भूभागका थोरै स्थानहरूमा अहिले मेघगर्जन र चट्याङसहित हल्कादेखि मध्यम वर्षा भइरहेको छ। आज दिउँसो पनि देशको हिमाली र पहाडी भूभागमा साधारणतया बदली रहने मौसम पूर्वानुमान महाशाखाले जनाएको छ। कोशी, लुम्बिनी र कर्णाली प्रदेशका केही स्थानहरूमा मेघगर्जन र चट्याङसहित मध्यम वर्षा तथा हिमपातको समेत सम्भावना रहेको छ। यसैबीच, पहाडमा पानी परिरहँदा तराईका क्षेत्रमा भने अत्यधिक गर्मी बढ्ने देखिएको छ। मधेश, बागमती, गण्डकी, लुम्बिनी र सुदूरपश्चिम प्रदेशका तराई भूभागका केही स्थानहरूमा तातो हावा (लू) चल्ने सम्भावना रहेकाले महाशाखाले सतर्कता अपनाउन आह्वान गरेको छ। आज राति कोशी प्रदेश लगायत देशको हिमाली र पहाडी भूभागमा साधारणतया बादल लाग्नेछ। मधेश, बागमती र गण्डकी प्रदेशका तराई भूभागमा आंशिक बदली भए पनि बाँकी तराईका भूभागहरूमा भने मौसम मुख्यतया सफा रहनेछ।
काठमाडौँ । हाल नेपालको उपल्लो वायुमण्डलमा पश्चिमी न्यून चापीय रेखाका साथै स्थानीय वायुको आंशिक प्रभाव रहेको छ। यसैको प्रभावका कारण अहिले कोशी, मधेस, बागमती र सुदूरपश्चिम प्रदेश लगायत देशका हिमाली तथा पहाडी भूभागमा साधारणतया बादल लागेको छ भने तराई क्षेत्रमा मौसम मुख्यतया सफा रहेको छ। आज दिउँसो पनि कोशी प्रदेश लगायत देशका हिमाली र पहाडी भूभागमा साधारणतया बादल लाग्ने र तराईमा आंशिक बादल लाग्ने देखिन्छ। यसैगरी आज लुम्बिनी, कर्णाली र सुदूरपश्चिम प्रदेशका साथै देशका हिमाली र पहाडी भूभागका थोरै स्थानहरूमा चट्याङ्गसहित मध्यम वर्षाको सम्भावना रहेको छ। मधेस प्रदेश लगायत कोशी, बागमती र गण्डकी प्रदेशको तराई भूभागका एक-दुई स्थानमा पनि वर्षा हुन सक्ने महाशाखाले जनाएको छ। वर्षासँगै तराईमा भने गर्मीको प्रकोप रहनेछ। मधेस र लुम्बिनी प्रदेशका तराई भूभागका थोरै स्थानहरूमा मध्यम तातो लहर (लु) चल्ने सम्भावना छ भने कोशी, बागमती, गण्डकी र सुदूरपश्चिम प्रदेशका तराईका केही स्थानहरूमा तातो दिन हुने अनुमान गरिएको छ। आज रातिको समयमा कोशी प्रदेश लगायत देशको हिमाली भूभागमा साधारणतया बादल लाग्नेछ भने पहाडी भूभाग तथा मधेस प्रदेशमा आंशिक बादल रहनेछ। राति कोशी प्रदेशका थोरै स्थानहरूमा र मधेस प्रदेश लगायत बागमती, गण्डकी, लुम्बिनी र कर्णाली प्रदेशको हिमाली तथा पहाडी भूभागका एक-दुई स्थानमा हल्का वर्षाको सम्भावना रहेको मौसम पूर्वानुमान महाशाखाले जनाएको छ।
म्याग्दीको मालिका गाउँपालिका–६, डाँडाखर्ककी ७० वर्षीया राममाया खत्रीले जीवनमै पहिलो पटक नेपाली नागरिकताको प्रमाणपत्र पाएकी छन्। जिल्ला प्रशासन कार्यालय म्याग्दीले उनलाई मङ्गलबार नागरिकता उपलब्ध गराएको हो। शारीरिक रूपमा अपाङ्गता भएकी एकल महिला राममाया नागरिकता नहुँदा अहिलेसम्म राज्यका सेवा-सुविधाबाट वञ्चित थिइन्। वि.सं. २०१३ सालमा जन्मिएकी उनको एउटा हात चल्दैन। उनका कान्छा भाइ गर्भे खत्रीले आवश्यक कागजपत्र जुटाएर जिल्ला प्रशासन कार्यालय पुर्याएपछि मात्र राममायाले नागरिकता पाएकी हुन्। प्रमुख जिल्ला अधिकारी रवीन्द्र आचार्य र सहायक प्रजिअ कुलप्रसाद आचार्यले उनलाई नागरिकता हस्तान्तरण गरे। नागरिकता पाएपछि निकै खुसी भएकी राममायाले अब सामाजिक सुरक्षा भत्ताका लागि प्रक्रिया सुरु गर्ने बताएकी छन्। नागरिकता प्राप्त गरेलगत्तै उनले राष्ट्रिय परिचयपत्रका लागि पनि आवेदन दिएकी छन्। नेपालमा १८ वर्ष पुगेपछि नागरिकता पाइने व्यवस्था छ। तर, दुर्गम ठाउँमा नागरिकता किन र कसरी बनाउने भन्ने चेतना नहुँदा धेरै नागरिक बुढेसकालसम्म पनि नागरिकता विहीन हुनु दुःखद रहेको प्रजिअ आचार्यले बताए। प्रशासनले आवश्यक प्रक्रिया पूरा गरेर आउँदा कुनै झन्झट नहुने स्पष्ट पारेको छ। म्याग्दीका ग्रामीण बस्तीमा अझै पनि आर्थिक अवस्था कमजोर र अपाङ्गता भएका धेरै व्यक्तिहरू नागरिकता लिनबाट छुटिरहेको समाचारमा उल्लेख छ।
जल तथा मौसम विज्ञान विभागका अनुसार हाल नेपालमा पश्चिमी न्यून चापीय रेखा, स्थानीय वायु र नेपाल नजिक रहेको न्यून चापीय रेखाको संयुक्त प्रभाव देखिएको छ। यस मौसमी प्रणालीका कारण कर्णाली र सुदूरपश्चिम लगायत कोशी, बागमती, गण्डकी र लुम्बिनी प्रदेशका पहाडी तथा हिमाली भू-भागमा सामान्य बदली रहेको छ भने तराईका क्षेत्रमा आंशिक बदली देखिएको छ। हाल कोशी, बागमती र कर्णालीका केही स्थान तथा गण्डकी र सुदूरपश्चिमका एक-दुई स्थानमा मेघगर्जन र चट्याङसहित हल्कादेखि मध्यम वर्षा भइरहेको छ। आज दिउँसो पनि देशका पहाडी र हिमाली क्षेत्रमा सामान्य तथा तराईमा आंशिक बदली रहनेछ। यस क्रममा कर्णाली, सुदूरपश्चिम, कोशी, बागमती र गण्डकीका पहाडी तथा हिमाली क्षेत्रका थोरै स्थान र कोशी तथा लुम्बिनीका तराईका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको छ। आज राति भने देशको हिमाली क्षेत्रमा सामान्य र पहाडी भू-भागमा आंशिक बदली रहनेछ भने तराईको मौसम मुख्यतया सफा रहनेछ। रातिको समयमा सुदूरपश्चिम र कर्णालीका पहाडी तथा हिमाली क्षेत्रका साथै कोशी, बागमती, गण्डकी र लुम्बिनीका हिमाली भू-भागका एक-दुई स्थानमा हल्का वर्षा र हिमपातको सम्भावना रहेको छ।
काठमाडौं, जेठ १४ । आजदेखि लगातार चार दिन सरकारी कार्यालय बन्द रहने भएका छन्। सरकारले इस्लाम धर्मावलम्बीहरूको पर्व बकर इदका अवसरमा आज सार्वजनिक बिदा दिएको हो। गृह मन्त्रालय ले शुक्रबार विज्ञप्ति जारी गर्दै बकर इदको अवसरमा बिहीबार सार्वजनिक बिदा दिने निर्णय गरेको जनाएको थियो। त्यस्तै, भोलि जेठ १५ गते गणतन्त्र दिवसका अवसरमा सार्वजनिक बिदा परेको छ भने जेठ १६ गते शनिबार र १७ गते आइतबार साप्ताहिक बिदा परेकाले लगातार चार दिन सार्वजनिक बिदा परेको हो। यसबीच स्वास्थ्य तथा जनसंख्या मन्त्रालय ले सार्वजनिक बिदाका दिन पनि सरकारी अस्पतालहरूको ओपीडी सेवा आंशिक रूपमा सञ्चालन गर्न निर्देशन दिएको छ। यद्यपि, कतिपय अस्पतालहरूले जनशक्ति व्यवस्थापन तथा प्रशासनिक कठिनाइका कारण पूर्ण रूपमा सेवा सञ्चालन गर्न नसकिने बताएका छन्।
सुर्खेत। चौकुने गाउँपालिकामा मुक्त हलिया तथा दलित समुदायका युवायुवतीहरुलाई लक्षित गर्दै सञ्चालन गरिएको पाँच दिने पालिका स्तरीय रूपान्तरण शिक्षा प्रशिक्षक प्रशिक्षण तालिम (TEP) सम्पन्न भएको छ। स्थानीयदेखि विश्वव्यापी मानवअधिकार वकालतमार्फत नेपालमा सीमान्तकृत समुदाय तथा सामाजिक रूपमा बहिष्कृत जनसंख्याको सशक्तीकरण गर्ने उद्देश्यसहित सञ्चालन गरिएको L2G परियोजना अन्तर्गत तालिम आयोजना गरिएको हो। २०८३ जेठ ४ गतेदेखि ८ गतेसम्म सञ्चालन भएको तालिम चौकुने गाउँपालिका वडा नं. १ देखि १० सम्मका युवा युवतीहरुको सहभागितामा सम्पन्न भएको छ। तालिममा प्रशिक्षक हरीसिंह बोहरा र भुवन चुनाराले सहजीकरण गर्नुभएको थियो। डम्मरे कामिको अध्यक्षतामा सम्पन्न समापन कार्यक्रममा चौकुने गाउँपालिका अध्यक्ष खडक बि.क. वासपाने प्रमुख अतिथि रहनुभएको थियो भने बिशेष अतिथि प्रमुख प्रशासकीय अधिकृत पूर्ण बहादुर बि.क. राष्ट्रिय मुक्त हलिया महासंघ नेपालका केन्द्रीय उपाध्यक्ष पर्वत सुनारको समेत उपस्थिति रहेको थियो। कार्यक्रमलाई सम्बोधन गर्दै प्रमुख अतिथि खडक बि.क. वासपानेले समाजमा पछाडि पारिएका समुदायका युवाहरुलाई शिक्षा, सीप र नेतृत्व विकासमार्फत सशक्त बनाउन यस्ता तालिम प्रभावकारी हुने बताउनुभयो। उहाँले समुदायमा चेतना र सकारात्मक परिवर्तन ल्याउन युवाहरुको भूमिका महत्वपूर्ण रहने उल्लेख गर्नुभयो। त्यस्तै राष्ट्रिय मुक्त हलिया महासंघ नेपालका केन्द्रीय उपाध्यक्ष पर्वत सुनारले मुक्त हलिया तथा दलित समुदायको अधिकार सुनिश्चित गर्न राज्य र समुदाय दुवै पक्ष जिम्मेवार बन्नुपर्ने धारणा राख्नुभयो। उहाँले तालिमले सहभागी युवाहरुलाई सामाजिक रूपान्तरणको अभियानमा सक्रिय बन्न प्रेरणा दिएको बताउनुभयो। कार्यक्रम राष्ट्रिय मुक्त हलिया समाज महासंघ नेपाल तथा जिल्ला मुक्त हलिया समाज सुर्खेतको आयोजनामा तथा चौकुने गाउँपालिकाको समन्वयमा सम्पन्न भएको हो।
काठमाडौं । देशका विभिन्न क्षेत्रमा आज मेघगर्जन, चट्याङसहित वर्षा तथा हिमपातको सम्भावना रहेको छ। जल तथा मौसम विज्ञान विभागअन्तर्गत मौसम पूर्वानुमान महाशाखाका अनुसार हाल नेपालमा पश्चिमी तथा स्थानीय वायुका साथै नेपालको पूर्वी भू-भाग नजिक तल्लो वायुमण्डलमा रहेको न्यूनचापीय क्षेत्रको प्रभाव कायम रहेको छ। महाशाखाले यस प्रणालीको प्रभावका कारण देशका हिमाली तथा पहाडी भू-भागमा सामान्य बदली रहने तथा तराई क्षेत्रमा आंशिक बदली रहने जनाएको छ। आज लुम्बिनी, कर्णाली र सुदूरपश्चिम प्रदेशका केही स्थानसहित अन्य प्रदेशका हिमाली तथा पहाडी भू-भागमा मेघगर्जन तथा चट्याङसहित मध्यम वर्षा हुने सम्भावना रहेको छ। उच्च हिमाली क्षेत्रमा हल्का हिमपातको सम्भावना पनि रहेको महाशाखाले जनाएको छ। त्यस्तै, तराईका केही स्थानमा पनि मेघगर्जन तथा चट्याङसहित हल्का वर्षा हुन सक्ने पूर्वानुमान गरिएको छ। आज राति भने कोशी प्रदेशसहित देशका हिमाली भू-भागमा सामान्य बदली रहनेछ भने अन्य भू-भागमा आंशिक बदली कायम रहने जनाइएको छ। कोशी प्रदेशका थोरै स्थानमा मेघगर्जन तथा चट्याङसहित मध्यम वर्षाको सम्भावना रहेको छ। साथै मधेस प्रदेशसहित अन्य पहाडी तथा हिमाली क्षेत्रका एक–दुई स्थानमा हल्का वर्षा तथा हिमपात हुन सक्ने महाशाखाले जनाएको छ। मौसममा आएको परिवर्तनसँगै चट्याङ, वर्षा तथा हिमपातबाट हुन सक्ने सम्भावित जोखिमप्रति सतर्क रहन महाशाखाले सर्वसाधारणलाई आग्रह गरेको छ।
काठमाडौँ । काठमाडौँ महानगरपालिका, पशुपति क्षेत्र विकास कोष र मानव सेवा आश्रमको संयुक्त पहलमा सञ्चालनमा ल्याइएको होल्डिङ सेन्टरको पहिलो दिन ३६ जना सडक सहयोगापेक्षीको उद्धार गरिएको छ। तिलगंगामा मंगलबारदेखि सुरु भएको यस सेन्टरमा पुर्याइएकामध्ये ६ जना भने पर्खाल नाघेर भागेका छन्। हाल सेन्टरमा २८ जनालाई राखेर उनीहरूको पहिचान गर्ने काम भइरहेको छ। सेन्टरको निरीक्षण गर्दै काठमाडौँ महानगरपालिकाकी कार्यवाहक प्रमुख सुनिता डंगोलले सडकमा अलपत्र परेका र सहारा नभएका असहायका लागि महानगरले उचित व्यवस्थापन गर्ने बताइन्। उनले काठमाडौँलाई सहयोगापेक्षी मानवमुक्त सहर बनाउने अभियानमा सबै पक्षको समन्वय आवश्यक रहेकोमा जोड दिइन्। यस्तै, कोषका कार्यकारी निर्देशक सुवासचन्द्र जोशीले सेन्टरको सुरक्षा र पूर्वाधारलाई थप व्यवस्थित बनाइने बताए। मानव सेवा आश्रमका उपत्यका इन्चार्ज कृष्ण पौडेलका अनुसार उद्धार गरिएकाहरूमा ६ जना महिला र ३० जना पुरुष छन्। तीमध्ये ४ जनामा मानसिक समस्या देखिएको छ भने एकजना ज्येष्ठ नागरिक कुकुरको टोकाइबाट घाइते भएका छन्। उद्धार गरिएकाहरू सोलुखुम्बु, सुर्खेत, खोटाङ लगायत विभिन्न जिल्लाका रहेका छन्, जसमा शारीरिक रूपमा अशक्त र वैशाखीको सहारा लिनेहरू समेत छन्।