सुर्खेत । चौकुने गाउँपालिका–६ स्थित वनडाल सामुदायिक वनको ओडारमा लुकाइराखिएको अवस्थामा प्रहरीले छ थान भरुवा बन्दुक बरामद गरेको छ।
अवैध हातहतियार लुकाएर राखिएको सूचनाका आधारमा इलाका प्रहरी कार्यालय बाबियाचौरबाट खटिएको प्रहरी टोलीले खोजतलास गर्ने क्रममा बिहीबार साँझ ६ः१५ बजे एकनाले भरुवा बन्दुक बरामद गरेको हो। घटनाबारे थप अनुसन्धान भइरहेको जिल्ला प्रहरी कार्यालय सुर्खेतले जनाएको छ।
मुस्ताङको लोमान्थाङ केन्द्रबिन्दु भएर मंगलबार राति भूकम्प गएको छ। राष्ट्रिय भूकम्प मापन तथा अनुसन्धान केन्द्रका अनुसार राति ९ बजेर ५३ मिनेट जाँदा ५.३ म्याग्निच्युडको भूकम्प गएको हो। राष्ट्रिय भूकम्प मापन तथा अनुसन्धान केन्द्रका वरिष्ठ भूकम्पविद् डा. लोकविजय अधिकारीका अनुसार भूकम्पको केन्द्रबिन्दु मुस्ताङको लोमान्थाङ आसपास रहेको थियो। भूकम्पको धक्का केन्द्रबिन्दु नजिकका जिल्लासँगै संघीय राजधानी काठमाडौँ उपत्यकासम्म पनि हल्का महसुस गरिएको उनले जानकारी दिए। रातिको समयमा अचानक भूकम्पको धक्का महसुस भएपछि काठमाडौँ उपत्यकासहित विभिन्न स्थानका सर्वसाधारण केहीबेर त्रसित भएका थिए। सामाजिक सञ्जालमार्फत पनि धेरै व्यक्तिले आफूहरूले भूकम्पको धक्का महसुस गरेको बताएका छन्। भूकम्पबाट हालसम्म कुनै मानवीय वा भौतिक क्षतिको विवरण प्राप्त भएको छैन। सम्बन्धित निकायहरूले भूकम्पपछिको सम्भावित क्षतिको विवरण संकलन तथा अवस्थाको अनुगमन गरिरहेका छन्। नेपाल भूकम्पीय जोखिमको दृष्टिले संवेदनशील क्षेत्रमा पर्ने भएकाले मध्यम तथा साना परकम्पहरू समय–समयमा जाने गरेका छन्। विशेषगरी हिमाली तथा पहाडी क्षेत्रमा केन्द्रबिन्दु भएर जाने भूकम्पको धक्का काठमाडौँ उपत्यकासम्म महसुस हुन सक्ने भूकम्पविद्हरू बताउँछन्। अधिकारीहरूले भूकम्पको धक्का महसुस हुँदा नआत्तिन, सुरक्षित स्थानमा बस्न तथा आवश्यक सावधानी अपनाउन सर्वसाधारणलाई आग्रह गर्दै आएका छन्। भूकम्पपछि थप परकम्प आउन सक्ने सम्भावना रहने भएकाले जोखिमयुक्त भवन, कमजोर संरचना तथा भत्किन सक्ने वस्तुबाट सतर्क रहनुपर्ने हुन्छ। मुस्ताङको लोमान्थाङ केन्द्रबिन्दु भएर गएको यस भूकम्पबाट भएको सम्भावित क्षति तथा थप विवरण प्राप्त हुने क्रम जारी रहेको छ।
काठमाडौँ महानगरपालिका–१० शङ्खमुलस्थित भ्याली ब्वाइज होस्टलमा कुटपिट तथा धारिलो हतियार प्रहारबाट एक युवकको मृत्यु भएको । घटनामा संलग्न भएको अभियोगमा एक किशोर पक्राउ परेका छन्। केन्द्रीय प्रहरी समाचारकक्षका अनुसार दाङको घोराही उपमहानगरपालिका–१७ का स्थायी बासिन्दा २२ वर्षीय वसन्त कालाथोकीलाई शुक्रबार बिहान होस्टलमै १८ वर्षीय किशोर र २० वर्षीय प्रमित पटेलले कुटपिट तथा धारिलो हतियार प्रहार गरी गम्भीर घाइते बनाएका थिए। गम्भीर घाइते कालाथोकीको मीनभवनस्थित निजामती कर्मचारी अस्पतालमा उपचारका क्रममा मृत्यु भएको हो । घटनालगत्तै प्रहरी वृत्त नयाँ बानेश्वरबाट खटिएको टोलीले बाराको कलैया उपमहानगरपालिका–३ घर भएका १८ वर्षीय किशोरलाई पक्राउ गरेको हो। घटनामा संलग्न भएको आरोपमा अन्य पाँच जनालाई प्रहरीले नियन्त्रणमा लिएको छ भने फरार रहेका प्रमित पटेलको खोजी भइरहेको छ।
सुर्खेत, २७ साउन । सुर्खेतको भेरीगंगा नगरपालिका–१३ रामघाटमा श्रीमानले आफ्नै श्रीमतीमाथि पेट्रोल छर्किएर आगो लगाउँदा उनी गम्भीर घाइते भएकी छन्। सुर्खेत प्रहरीका अनुसार स्थानीय ४९ वर्षीय जयबहादुर रानाले ५० वर्षीया श्रीमती महेश्वरी रानामाथि साउन २६ गते साँझ करिब ५ बजे पेट्रोल छर्किएर आगो लगाएका हुन्। आगलागीपछि उनीहरूकी १८ वर्षीया छोरी पुष्पा रानाले आगो निभाएकी थिइन्। आगोले महेश्वरीको अनुहार, घाँटीसहित शरीरका विभिन्न भाग गरी करिब ३५ देखि ३६ प्रतिशत भाग जलेको प्रहरीले जनाएको छ। घाइते महेश्वरीलाई छोरी पुष्पाले साँझ ६ः१५ बजे कर्णाली प्रदेश अस्पताल कालागाउँ पुर्याएकी थिइन्। अस्पतालले प्रारम्भिक उपचारपछि थप उपचारका लागि साँझ ६ः४० बजे नेपालगन्ज रिफर गरेको थियो। थप उपचारका लागि उनलाई भारतको लखनउ लगिएको जनाइएको छ। घटनाबारे प्रहरीले थप अनुसन्धान गरिरहेको छ।