गोरखाको लक्ष्मीबजारमा पहिरोले घर बगाएको छ।
गोरखा नगरपालिका ९ लक्ष्मीबजारदेखि शिखर जाने बाटोमा दिवामार्गमा स्थानीय मानसिंह गुरूङको तीन तले पक्की घर पहिरोले बगेको हो।
अविरल वर्षापछिको पहिरोले आज घर बगेको हो।
सडकसँगै रहेको घर पहिरिएर करिब २० मिटर तल पुगेको छ।
पहिरो जाँदा घरमा एक जना मात्रै थिए। डेरा गरी बसेका रौतहट कटहरिया नगरपालिका ७ घर भएका टोखान महतो सामान्य घाइते छन्। उनको प्रदेश अस्पताल गोरखामा उपचार भइरहेको छ।
सुर्खेत, साउन १८— सुर्खेतको वीरेन्द्रनगरमा मोटरसाइकल दुर्घटना हुँदा चालक गम्भीर घाइते भएका छन्। वीरेन्द्रनगर नगरपालिका–२ स्थित उत्तरगंगा मन्दिर नजिक सोमबार बिहान करिब ५:४५ बजे मूलपानी चोकबाट फलाटेतर्फ जाँदै गरेको कर्णाली प्रदेश ०२–००१ प ४८७ नम्बरको १५० सीसी पल्सर मोटरसाइकल अनियन्त्रित भई पल्टिएको प्रहरीले जनाएको छ। दुर्घटनामा चालक कालिकोटको महावै गाउँपालिका–४ घर भई हाल वीरेन्द्रनगर–१० रहलपुर बस्ने २४ वर्षीय समीर सिंह गम्भीर घाइते भएका छन्। टाउकोमा गम्भीर चोट लागेका उनलाई प्रारम्भिक उपचारपछि कर्णाली प्रदेश अस्पताल, कालागाउँमा रेफर गरिएको छ। अस्पतालमा उनको अवस्था गम्भीर रहेको र बोल्न नसक्ने अवस्थामा रहेको प्रहरीले जनाएको छ। घटनापछि प्रहरी सहायक निरीक्षक शिव मैनालीको नेतृत्वमा ट्राफिकसहितको प्रहरी टोली घटनास्थल पुगेको थियो। दुर्घटनाग्रस्त मोटरसाइकल प्रहरीले नियन्त्रणमा लिई घटनाबारे थप अनुसन्धान गरिरहेको जनाएको छ।
जनकपुर, साउन १७ — गृहमन्त्री सुधन गुरुङ र हिन्दू सम्राट सेना नेपालबीच भएको वार्तापछि आन्दोलनका सबै कार्यक्रम फिर्ता लिने सहमति भएको छ। जनकपुरधाममा करिब डेढ घण्टा चलेको वार्तामा हिन्दू सम्राट सेनाले आफ्नो १३ बुँदे मागमा थप ६ बुँदा समेटेर १९ बुँदे प्रस्ताव सरकारलाई बुझाएको जनाएको छ। सरकारका तर्फबाट ती मागहरूलाई सकारात्मक रूपमा लिँदै कार्यान्वयनका लागि आवश्यक प्रक्रिया अघि बढाउने समझदारी भएको बताइएको छ। वार्तामा आन्दोलनका क्रममा पक्राउ परेकाहरूलाई रिहा गर्ने, उनीहरूमाथि मुद्दा नचलाउने तथा गोली चलेको घटनाको छानबिन गरी दोषी देखिए कानुनबमोजिम कारबाही गर्ने विषयमा पनि सहमति भएको हिन्दू सम्राट सेनाले जनाएको छ। सरकारबाट माग सम्बोधन हुने आश्वासन पाएपछि हिन्दू सम्राट सेनाले सबै आन्दोलन तथा विरोधका कार्यक्रम फिर्ता लिएको छ। सहमतिको विस्तृत विवरण र कार्यान्वयनको समयसीमाबारे भने सरकारको औपचारिक जानकारी आउन बाँकी छ।
सुर्खेत, साउन १७ — सुर्खेतको वीरेन्द्रनगरबाट १० ग्रामभन्दा बढी ब्राउनसुगरसहित एक जना पक्राउ परेका छन्। विशेष सूचनाका आधारमा जिल्ला प्रहरी कार्यालय सुर्खेत र लागूऔषध नियन्त्रण ब्युरो शाखा कार्यालय सुर्खेतको संयुक्त टोलीले वीरेन्द्रनगर–५ कालिकाटोल निवासी ३० वर्षीय प्रकाश कँडेललाई शनिबार बिहान साढे ११ बजेतिर उनकै कोठाबाट पक्राउ गरेको हो। प्रहरीले कोठामा खानतलासी गर्दा १ पोका र ९ पुडियामा रहेको शुद्ध तौल १० ग्राम ६५० मिलिग्राम ब्राउनसुगर जस्तो देखिने धुलो पदार्थ बरामद गरेको जनाएको छ। पक्राउ परेका कँडेललाई जिल्ला प्रहरी कार्यालय सुर्खेतको नियन्त्रणमा राखी लागूऔषध सम्बन्धी कसुरमा थप अनुसन्धान भइरहेको प्रहरीले जनाएको छ।