सुर्खेत, साउन १ ।

सुर्खेतकी १६ वर्षीया इनिशा विकको बलात्कार तथा हत्या अभियोगमा पक्राउ परेका चार किशोरमध्ये तीन जनाको घटनामा प्रत्यक्ष संलग्नता नदेखिएको फरेन्सिक (डीएनए र सेरोलोजी) प्रतिवेदन सार्वजनिक भएको छ। प्रतिवेदनले मुख्य अभियुक्तका रूपमा चिनिएका ‘वीरेन्द्रनगर प’ को मात्र इनिशासँग शारीरिक सम्पर्क भएको पुष्टि गरेको छ भने अन्य तीन किशोर ‘वीरेन्द्रनगर फ’, ‘वीरेन्द्रनगर ध’ र ‘वीरेन्द्रनगर न’ को डीएनएसँग घटनास्थल वा मृतकबाट संकलित कुनै नमुना नमिलेको उल्लेख गरिएको छ।

घटनापछि चारै किशोरलाई पक्राउ गरी सामूहिक बलात्कार र हत्या अभियोगमा मुद्दा दायर गरिएको थियो। जिल्ला अदालतको आदेशपछि उनीहरू १७ चैतदेखि नेपालगञ्जस्थित बाल सुधार गृहमा पुर्पक्षका लागि थुनामा छन्। तर डीएनए र सेरोलोजी परीक्षणको अन्तिम प्रतिवेदन भने उनीहरू थुनामा परेको करिब तीन महिनापछि मात्रै आएको हो।

प्रतिवेदनअनुसार मुख्य अभियुक्त ‘प’ को गुप्ताङ्गको रौँ, शर्ट, सेतो गन्जी, घटनास्थलमा भेटिएको कण्डम र मृतकको नङभित्र भेटिएको पुरुष डीएनए एउटै भएको पुष्टि भएको छ। साथै ‘प’ को शरीर र कपडाबाट संकलित नमुनाहरू पनि इनिशाको शरीर र कपडाबाट संकलित नमुनासँग मेल खाएका छन्। सेरोलोजी परीक्षणमा पनि ‘प’ का विभिन्न नमुनामा मानव रगत भेटिएको र त्यसको डीएनए इनिशासँग मिलेको उल्लेख गरिएको छ।

विपरीत, अन्य तीन किशोरको डीएनए इनिशाको शरीर, घटनास्थल वा कण्डमबाट संकलित कुनै पनि नमुनासँग मेल नखाएको तथा उनीहरूको शरीर वा अन्डरवेयरमा रगतको कुनै अवशेष पनि नपाइएको प्रतिवेदनमा उल्लेख छ।

घटना २३ फागुनको बिहान वीरेन्द्रनगर–४ स्थित जनजागरण सामुदायिक वनमा भएको थियो। इनिशा आफ्ना प्रेमी भनिएका ‘वीरेन्द्रनगर प’ सँग वनमा गएकी थिइन् र त्यसपछि जीवित फर्किन सकिनन्। पोस्टमार्टम रिपोर्टमा उनको मृत्यु यौनाङ्गको भित्री भागमा लागेको गहिरो चोटका कारण अत्यधिक रक्तस्रावबाट भएको उल्लेख गरिएको छ।

मुख्य अभियुक्त ‘प’ ले प्रहरीसमक्ष दिएको बयानमा यौन सम्पर्कका क्रममा अत्यधिक रक्तस्राव भएपछि आफूले साथीहरूलाई फोन गरेर बोलाएको बताएका थिए। उनले घटनाको जिम्मेवारी आफ्नो भएको स्वीकार गरे पनि अन्य तीन जनालाई मुछेका थिएनन्। तीनै किशोरले पनि छुट्टाछुट्टै बयानमा यही विवरणसँग मिल्ने कुरा बताएका थिए।

नेपाल प्रहरीको केन्द्रीय अनुसन्धान ब्युरो (सीआईबी) ले सीसीटीभी फुटेज र कल डिटेल रेकर्ड विश्लेषण गरी घटनास्थलमा ती तीन किशोर इनिशा बेहोस भएको धेरैपछि मात्र पुगेको निष्कर्ष निकालेको थियो। प्रहरीले सुरुमा मुख्य अभियुक्तलाई बलात्कार र हत्यामा तथा अन्य तीन जनालाई घटनास्थल पुगेर पनि उद्धार नगरेको अभियोगमा मात्रै मुद्दा चलाउन सिफारिस गरेको थियो। तर सरकारी वकिल कार्यालयले चारै जनाविरुद्ध सामूहिक बलात्कार र हत्या अभियोग दर्ता गरेको थियो।

फरेन्सिक प्रतिवेदनले प्रहरीको प्रारम्भिक अनुसन्धान र मुख्य अभियुक्तको बयानसँग मेल खाए पनि सरकारी वकिलको सामूहिक बलात्कारको दाबीलाई पुष्टि नगरेको देखिएको छ। यद्यपि डीएनए प्रतिवेदन आफैं अदालतको अन्तिम फैसला नभएको र कसैको डीएनए नभेटिनुको अर्थ घटनामा कुनै भूमिका थिएन भन्ने निष्कर्ष निकाल्न नमिल्ने उल्लेख गरिएको छ। प्रयोगशालाले परीक्षण गरिएका नमुनाका आधारमा मात्रै निष्कर्ष दिएको र केही थप परीक्षण गर्न आवश्यक सुविधा उपलब्ध नभएको पनि प्रतिवेदनमा उल्लेख छ।

हालकी जिल्ला न्यायाधिवक्ता तुलसा भण्डारीले अभियोग दर्ता गर्दा फरेन्सिक प्रतिवेदन प्राप्त नभएकाले त्यसलाई सोही सन्दर्भमा हेर्नुपर्ने बताएकी छन्। प्रतिवेदनका आधारमा अभियोग संशोधन नहुने र अब अन्तिम निर्णय अदालतले गर्ने उनको भनाइ छ।

मुद्दाको सुनुवाइ जारी रहेकाले हालसम्म अभियुक्त, उनीहरूका साक्षी तथा घटना देखेको वा सुनेको भन्ने व्यक्तिहरूको मात्रै बयान भएको छ। इनिशाकी आमा तिला विकसहित अन्य सरकारी साक्षीको बकपत्र हुन बाँकी छ। तिला विकले आफूलाई अहिलेसम्म फरेन्सिक प्रतिवेदनबारे कुनै आधिकारिक जानकारी नदिइएको भन्दै न्यायमा ढिलाइ भइरहेको गुनासो गरेकी छन्। अर्कोतर्फ, तीन किशोरका परिवारले झुटो अभियोगका कारण आफ्ना छोराहरू मानसिक रूपमा पीडित भएको बताएका छन्।