सुर्खेत, साउन १४ । सुर्खेतको वीरेन्द्रनगरमा अटोको ठक्करबाट गम्भीर घाइते भएका एक पैदल यात्रीको उपचारका क्रममा भारतको लखनउमा मृत्यु भएको छ।

मृत्यु हुनेमा वीरेन्द्रनगर नगरपालिका–११ निवासी ६० वर्षीय रत्नबहादुर विक रहेका छन्। गत असार २४ गते बिहान करिब १० बजे वीरेन्द्रनगर–११ स्थित धुलियाबिट नजिकको भित्री सडकमा कर्णाली प्रदेश ०२००१ स १०९४ नम्बरको अटोले उनलाई ठक्कर दिएको थियो। अटो सोही स्थानका २३ वर्षीय राजु सुनारले चलाएका थिए।

दुर्घटनामा विकको टाउको र ढाडमा गम्भीर चोट लागेको थियो। उनलाई तत्काल उद्धार गरी कर्णाली केयर अस्पताल सुर्खेत पुर्‍याइएको थियो। स्वास्थ्य अवस्था जटिल बन्दै गएपछि सोही दिन नेपालगञ्ज नर्सिङ होम रिफर गरिएको थियो। त्यहाँ पनि उपचार सम्भव नभएपछि असार २६ गते भारतको लखनउस्थित सिटी अस्पताल लगिएको थियो।

उपचारकै क्रममा साउन १४ गते बिहान ४ बजे विकको मृत्यु भएको प्रहरीले जनाएको छ। मृतकको शव प्रदेश अस्पताल कालागाउँ, सुर्खेतको शवगृहमा ल्याइएको छ।

दुर्घटनामा संलग्न अटो र चालक राजु सुनारलाई प्रहरीले नियन्त्रणमा लिई घटनाबारे थप अनुसन्धान गरिरहेको जनाएको छ।