उद्योग वाणिज्य तथा आपूर्ति मन्त्री गौरी कुमारी यादवले राजीनामा दिएकी छन् । यादवले बिहीबार प्रधानमन्त्री बालेन शाहलाई भेटेर राजीनामा बुझाएको उनको सचिवालयले जनाएको छ । यादवले बिहीबार ग्यास उद्योगीलाई पाता कस्नुपर्ने भन्दै विवादित अभिव्यक्ति दिएकी थिइन् ।
अविरल वर्षाका कारण पहिरो जाँदा नाग्म–गमगडी सडक एक सातादेखि ठप्प भएको छ। पिना र झ्यारी गाउँको बीचमा पर्ने टोप्लामा सडकको नामोनिसान नरहने गरी पहिरो खसेपछि यात्रुहरू पैदल यात्रा गर्न बाध्य छन्। सडक बन्द हुँदा पर्यटकीय स्थल राराताल जाने पर्यटक रोकिएका छन् भने मुगुको स्याउ निर्यातमा ठूलो समस्या भएको छ। सडक डिभिजन कार्यालय जुम्लाका निमित्त प्रमुख सर्वणकुमार महाताराका अनुसार टोप्लामा स्काभेटर र मेसिन प्रयोग गरी ग्याबिन वाल उठाउने काम भइरहेको छ। आज बेलुकीसम्म सडक खुलाउने लक्ष्य राखिएको छ। यसपछि ताल्चा विमानस्थल नजिकै खसेको डेढ सय मिटर पहिरो पन्छाउने काम सुरु गरिनेछ।
बाँके । जेन–जी आन्दोलनका क्रममा बाँकेका दुई बालसुधारगृह र नौबस्ता क्षेत्रीय कारागारबाट फरार भएका ३४० कैदी तथा बालबन्दीमध्ये १७१ जना पक्राउ परेका छन्। गत वर्ष भदौ २३ र २४ गते राति फरार भएकामध्ये अझै १६९ जना सम्पर्कविहीन रहेको जनाइएको छ। जयन्दु बालसुधारगृहबाट फरार ११५ जनामध्ये ६८, नौबस्ता बालसुधारगृहबाट फरार ७८ जनामध्ये ४७ र नौबस्ता क्षेत्रीय कारागारबाट फरार १४७ जनामध्ये ५६ जना पक्राउ परेका छन्। बाँकी फरार रहेकाको खोजी कार्य जारी रहेको सम्बन्धित निकायले जनाएको छ।
गृहमन्त्री सुधन गुरुङ ललितपुरको सातदोबाटोस्थित पौडी पोखरी परिसरमा निर्माण गरिएको ‘जेनजी स्मृति पार्क’ उद्घाटन नगरी फर्किएका छन् । निर्मित सालिकमा जेनजी सहिदहरुको अनुहार नमिलेको भन्दै परिवारजनले असन्तुष्टि जनाएका थिए । त्यसपछि गृहमन्त्री सुधन शालिक अनावरण नगरि फर्किएका हुन् । ‘निर्माण गरिएका सालिकसँग आन्दोलनमा ज्यान गुमाएका शहीदहरूको अनुहारसँग मेल खाँदैन । शालिक बनाउन लापरबाही गरिएको छ ,’ सहिद परिवारका एक सदस्यले भने । उक्त पार्कमा गत वर्षको भदौ २३ र २४ गते भएको जेनजी आन्दोलनका क्रममा सहादत प्राप्त गरेका ४५ जनाको शालिक निर्माण गरिएको छ । पौडी पोखरी परिसरको दुई रोपनी जग्गामा निर्माण गरिएको पार्कलाई शहीदहरूको स्मृति, राष्ट्रियता र सामूहिक स्मरणसँग जोड्ने गरी डिजाइन गरिएको सरकारले बताएको छ ।