अविरल वर्षाका कारण पहिरो जाँदा नाग्म–गमगडी सडक एक सातादेखि ठप्प भएको छ। पिना र झ्यारी गाउँको बीचमा पर्ने टोप्लामा सडकको नामोनिसान नरहने गरी पहिरो खसेपछि यात्रुहरू पैदल यात्रा गर्न बाध्य छन्।

सडक बन्द हुँदा पर्यटकीय स्थल राराताल जाने पर्यटक रोकिएका छन् भने मुगुको स्याउ निर्यातमा ठूलो समस्या भएको छ।

सडक डिभिजन कार्यालय जुम्लाका निमित्त प्रमुख सर्वणकुमार महाताराका अनुसार टोप्लामा स्काभेटर र मेसिन प्रयोग गरी ग्याबिन वाल उठाउने काम भइरहेको छ। आज बेलुकीसम्म सडक खुलाउने लक्ष्य राखिएको छ। यसपछि ताल्चा विमानस्थल नजिकै खसेको डेढ सय मिटर पहिरो पन्छाउने काम सुरु गरिनेछ।