कैलाली । कैलालीका विभिन्न स्थानबाट भारतबाट भन्सार छली अवैध रूपमा ल्याइएका करिब ७५ हजार ८ सय रुपैयाँ बराबरका सामान प्रहरीले बरामद गरेको छ।
जिल्ला प्रहरी कार्यालय कैलाली मातहतका कार्यालयबाट शुक्रबार खटिएको प्रहरी टोलीले विभिन्न स्थानमा बेवारिसे अवस्थामा रहेका चिनी, चना, पानीपुरी, प्लास्टिक झिल्ली लगायतका सामान फेला पारेको हो।
प्रहरीका अनुसार बरामद सामान आवश्यक प्रक्रिया पूरा गरी नियन्त्रणमा लिइएको छ।
दैलेखको आठबीस नगरपालिकाका दुई जना युवकलाई प्रहरीले पेस्तोल र गोलीसहित पक्राउ गरेको छ। पक्राउ पर्नेमा आठबीस नगरपालिका–६ का भीमबहादुर शाही र वडा नं. ५ का भूपेन्द्र शाही रहेका छन्। उनीहरूलाई शुक्रबार प्रहरीले नियन्त्रणमा लिएको हो। जिल्ला प्रहरी कार्यालय सुर्खेतका अनुसार अभद्र व्यवहारसम्बन्धी कसुरको अनुसन्धानका क्रममा सोधपुछ गर्दा भूपेन्द्र शाहीले हातहतियार लुकाएको खुलासा गरेका थिए। उनले आठबीस नगरपालिका–४ स्थित राकम खोलीबजार नजिकैको खोल्सामा स्वचालित पेस्तोल लुकाएर राखेको बयान दिएका थिए। उक्त बयानका आधारमा जिल्ला प्रहरी कार्यालय सुर्खेतबाट प्रहरी निरीक्षक कृष्ण चन्द्रको कमान्डमा प्रहरी टोली परिचालन गरिएको थियो। प्रहरी टोलीले खोल्साको झाडीमा कालो प्लास्टिकभित्र पोका पारेर राखिएको अवस्थामा ‘मेड इन चेकोस्लोभाकिया’ लेखिएको १ थान पेस्तोल फेला पारेको हो। बरामद गरिएको पेस्तोलमा प्रयोग हुने १ थान म्यागजिन र ५ राउन्ड गोलीसमेत बरामद गरिएको जिल्ला प्रहरी कार्यालय सुर्खेतका प्रहरी नायब उपरीक्षक (डिएसपी) कविन्द्रसिंह बोहराले जानकारी दिए। पक्राउ परेका दुवै जनालाई जिल्ला प्रहरी कार्यालय सुर्खेतको हिरासतमा राखेर घटनाबारे थप अनुसन्धान अगाडि बढाइएको प्रहरीले जनाएको छ।
आर्टिफिसियल इन्टेलिजेन्स (एआई) प्रयोग गरेर प्रधानमन्त्री कार्यालय (पीएमओ)को नक्कली परिचयपत्र बनाएको आरोपमा एकजना पक्राउ परेका छन्। घटना भारतको मुम्बईस्थित वान्ड्रे-कुर्ला कम्प्लेक्स (बीकेसी)को जियो वर्ल्ड प्लाजामा भएको हो। पक्राउ परेका २४ वर्षीय रोहन पारिखले आफूलाई पीएमओको अधिकारी बताउँदै सुरक्षाकर्मीलाई धम्क्याएको आरोप छ। उनले च्याटजीपीटीजस्ता एआई उपकरणको सहयोगमा नक्कली पीएमओ परिचयपत्र र पत्र तयार पारेको प्रहरीले बताएको छ। शुक्रबार बान्द्राको एस्प्लेनेड अदालतमा प्रहरीले रोहनको मोबाइल हेर्दा पीएमओ पत्रको मस्यौदा तयार गरेको प्रमाण भेटिएको बताएको छ। प्रहरीले रोहनले सन् २०२५ देखि सामाजिक हैसियत बढाउन नक्कली कागजात बनाउँदै आएको दाबी गरेको छ। प्रहरी हिरासत सकिएपछि रोहन र उनका साथमा रहेका ४९ वर्षीय पूर्व सैनिक दिलीप कुण्डेलाई अदालतमा पेश गरिएको थियो। प्रहरीले दिलीपको साथबाट लाइसेन्स प्राप्त रिभल्भरसमेत बरामद गरेको छ। अदालतले दुवैलाई १४ दिनको न्यायिक हिरासतमा पठाएको भारतीय सञ्चारमाध्यमले जनाएका छन्। उनीहरूको जमानत निवेदनमाथि सेप्टेम्बर १७ मा सुनुवाइ हुनेछ। प्रहरीले एआईबाट बनाइएका नक्कली कागजात अन्य ठाउँमा पनि प्रयोग भए नभएकोबारे अनुसन्धान गरिरहेको जनाएको छ।
दैलेख । जिल्ला प्रहरी कार्यालय सुर्खेतले दैलेखको आठबीस नगरपालिका–४ राकम खोलीबजार नजिकैबाट ‘मेड इन चेकोस्लोभाकिया’ लेखिएको पेस्तोलसहित दुई जनालाई पक्राउ गरेको छ। पक्राउ पर्नेमा आठबीस नगरपालिका–६ का ३० वर्षीय भीमबहादुर शाही र वडा नं. ५ का २७ वर्षीय भूपेन्द्र शाही रहेका छन्। अभद्र व्यवहारसम्बन्धी कसुरमा अनुसन्धान गर्ने क्रममा भूपेन्द्र शाहीले खोल्सामा पेस्तोल लुकाएर राखेको बताएपछि प्रहरीले खोजी गरेको थियो। खोजीका क्रममा कालो प्लास्टिकमा पोको पारेर राखिएको अवस्थामा १०५०२८ नम्बरको पेस्तोल, एक थान म्यागजिन र पाँच राउण्ड गोली बरामद गरिएको प्रहरीले जनाएको छ। पक्राउ परेका दुवै जनामाथि हातहतियारसम्बन्धी कसुरमा थप अनुसन्धान भइरहेको छ।