काठमाडौं — बलिउड अभिनेत्री नोरा फतेहीलाई भारतबाट देशनिकाला गर्न माग उठेको विषयले अहिले कानुनी र राजनीतिक रूप लिएको छ। कन्नड चलचित्र केडी: द डेभिलको एक गीतलाई लिएर सुरु भएको विवादले यस्तो अवस्था सिर्जना गरेको हो। उक्त चलचित्रमा सञ्जय दत्तसमेतको अभिनय रहेको छ। विवादित गीत ‘सरके चुनर तेरी सरके’ को हिन्दी संस्करण सार्वजनिक भएसँगै यसको शब्द र दृश्यलाई लिएर भारतभर विरोध चर्किएको हो। आलोचकहरूले गीतका शब्दहरू भद्दा, द्विअर्थी तथा महिलाको गरिमामाथि प्रहार गर्ने खालका रहेको आरोप लगाएका छन्। सामाजिक सञ्जालमा व्यापक आलोचना भएपछि भारतको सूचना तथा प्रसारण मन्त्रालयले विषयलाई गम्भीर रूपमा लिँदै केन्द्रीय फिल्म प्रमाणन बोर्डलाई निर्देशन दिएको थियो। त्यसपछि गीतको हिन्दी संस्करण युट्युबसहित डिजिटल प्लेटफर्मबाट हटाइएको छ। यसैबीच १० जना वकिलहरूको समूहले भारतको गृह मन्त्रालयमा निवेदन दिँदै नोरा फतेहीको श्रम स्वीकृति रद्द गर्न तथा उनलाई देशनिकाला गर्न माग गरेका छन्। विदेशी कलाकारले भारतीय संस्कृति र शालीनतामा असर पुर्याउन नहुने उनीहरूको तर्क छ। घटनामा राष्ट्रिय महिला आयोग र राष्ट्रिय मानव अधिकार आयोगले पनि चासो देखाउँदै सम्बन्धित पक्षसँग स्पष्टीकरण मागेका छन्। विवादबारे प्रतिक्रिया दिँदै नोरा फतेहीले उक्त गीत तीन वर्षअघि कन्नड भाषामा छायांकन गरिएको र त्यसबेला यसको अर्थ सामान्य बताइएको दाबी गरेकी छन्। हिन्दी संस्करण तयार गर्दा आफूलाई जानकारी नदिइएको उनको भनाइ छ। साथै, गीतको प्रचारमा आफ्नो र सञ्जय दत्तको एआई–निर्मित तस्बिर प्रयोग गरिएकोमा उनले आपत्ति जनाएकी छन्। गीतका लेखक रकीब आलमले विवादित शब्द आफूले नलेखेको बताएका छन् भने निर्देशक प्रेमले सार्वजनिक रूपमा माफी माग्दै गीत सच्याउने प्रतिबद्धता जनाएका छन्। आगामी अप्रिल ३०, २०२६ मा प्रदर्शन हुने तयारीमा रहेको चलचित्र ‘केडी: द डेभिल’ को व्यापारमा यस विवादले कस्तो प्रभाव पार्ने हो भन्नेबारे चासो बढेको छ। साथै, यस घटनाले भारतीय चलचित्र उद्योगमा सेन्सरसिप र सिर्जनात्मक नियन्त्रणबारे नयाँ बहस सुरु गरेको छ।
मुम्बई — बलिउड अभिनेत्री आलिया भट्टले सामाजिक सञ्जालबाट टाढा रहने चाहना व्यक्त गरेकी छिन्। ‘एस्क्वायर इन्डिया’लाई दिएको अन्तर्वार्तामा उनले सामाजिक सञ्जालले कहिलेकाहीँ आफूलाई मानसिक रूपमा थकित बनाउने गरेको बताउँदै यसबाट ब्रेक लिन मन लाग्ने उल्लेख गरेकी हुन्। सामाजिक सञ्जालमा निकै सक्रिय मानिने आलियाले अब कहिलेकाहीँ सबै प्लेटफर्म छोडेर केवल अभिनयमा मात्र ध्यान दिन चाहने भावना व्यक्त गरिन्। उनले भनिन्, “मलाई धेरै पटक सामाजिक सञ्जाल बन्द गरेर दुनियाँको झन्झटबाट टाढा रहँदै आफ्नो काममा मात्र केन्द्रित हुन मन लाग्छ।” उनका अनुसार बिहान उठ्दा कहिलेकाहीँ सामाजिक सञ्जाल मेटाइदिऊँ र केवल अभिनय गर्ने अभिनेत्री मात्र बनूँ जस्तो लाग्छ। “म यो निरन्तर चलिरहने कुराकानीमा तानिन चाहन्न,” उनले भनिन्, “तर यसो गर्दा सुरुबाट मलाई समर्थन गर्दै आएका धेरै मानिसहरूसँगको सम्पर्क टुट्ने डर पनि हुन्छ।” आलियाले आफ्नो व्यक्तिगत जीवनलाई अहिले निकै निजी बनाएको पनि स्पष्ट पारिन्। उनले भनिन्, “मेरो व्यक्तिगत जीवन यति निजी भइसकेको छ कि त्यसलाई साझा गर्न मलाई अलि गाह्रो लाग्छ। मेरो फोटो एल्बम अहिले छोरी राहाका तस्बिरहरूले भरिएको छ। आफ्नै तस्बिर खिच्न पनि मलाई निकै मेहनत गर्नुपर्छ।” मातृत्वले आफ्नो शरीर, सोच र जीवनशैलीमा ठूलो परिवर्तन ल्याएको आलियाको भनाइ छ। छोरी राहा जन्मिएपछि प्राथमिकता र दैनिकी पूर्ण रूपमा फेरिएको उनले बताइन्। आलिया भट्ट र अभिनेता रणवीर कपूरले अप्रिल २०२२ मा विवाह गरेका थिए भने उनीहरूको छोरी राहाको जन्म नोभेम्बर २०२२ मा भएको हो। यसअघि चर्चित गायिका नेहा कक्कडले पनि सामाजिक सञ्जाल र व्यक्तिगत सम्बन्धबाट केही समयका लागि ब्रेक लिने इच्छा सार्वजनिक गरेकी थिइन्।
देशकै चर्चित रियालिटी सो हिमालय रोडिजमा बाँकेको कोहलपुरका युवा अर्विन चन्द ठकुरी छनौट भएका छन् । चन्द हिमालय रोडिजको सिजन ६ को अडिसन राउण्डबाट छानिएका हुन् । उनी कम उमेरमै कोहलपुर र बाँके जिल्लाकै प्रतिनिधित्व गर्दै रोडिजमा छानिएका छन् । रोडिजमा छानिएकोमा चन्दलाई कोहलपुर वासी सबैले बधाई तथा सफलताको शुभकामना दिएका छन् । सामाजिक संजाल भरी चन्दलाई बधाई दिइरहेका छन ।