भारतमा स्कुल बस दुर्घटनामा ६ बालबालिकाको मृत्यु, ३५ भन्दा बढी घाइते भएका छन । भारत हरियाणाको कनिना क्षेत्रको उन्हानी गाउँमा रहेको महिला कलेज नजिकै बिहीबार बिहान स्कुल बस दुर्घटना हुँदा ६ बालबालिकाको मृत्यु भएको छ । भने उक्त दुर्घटनामा ३५ भन्दा बढी बालबालिका घाइते भएका छन ।
प्रहरी र प्रत्यक्षदर्शीका अनुसार बस ब्रेकले काम नगरे पछि बसका चालकले गुडिरहेको बसबाट हाम फालेका थिए । त्यसपछि चालकबिना बस रुखसँग ठोक्किएर पल्टिएको थियो । बस पल्टिनेबित्तिकै विद्यालयका बालबालिकाहरू बसको अगाडिको सिसा फुटाएर बाहिर खसेको प्रत्यक्षदर्शीहरुले बताएका छन् ।
बसमा जम्मा ४५ जना बालबालिका सवार थिए । करिब १० बालबालिका गम्भिर अवस्था रहेको बताइएको छ । जीएल पब्लिक स्कुल कनिनाको यो स्कुल बस सहलाङ, झाड्ली, धनौंडाबाट बालबालिका लिएर कनिनातर्फ आउँदै गरेको थियो । इदको बिदा भए पनि बिहीबार विद्यालय बन्द गरिएको छैन । घाइतेहरूलाई कनिना ल्याइएको छ, जहाँ केहीलाई नरनौल, पीजीआईएमएस रोहतक र रेवारीमा रिफर गरिएको छ प्रहरीकाअनुसार बस चालक भने अझै फरार छन् । स्थानीय प्रहरी अधिकृत उदय भानले सञ्चारमाध्यमलाई भने, ‘प्रारम्भिक अनुसन्धान र प्रत्यक्षदर्शीको बयानअनुसार चालकले मदिरा सेवन गरी बस चलाएको खुलेको छ । प्रहरीले यस विषयमा अनुसन्धान गरिरहेको छ । मृत्यु हुने अधिकांश बालबालिका धनौंडा गाउँका बासिन्दा हुन् ।”
बस पल्टिएपछि नजिकैका मानिसहरूले सबैभन्दा पहिले बालबालिकालाई बाहिर निकाल्न थाले । केही समयपछि प्रहरी घटनास्थल पुगेको थियो । प्रहरीले बाँकी अनुसन्धान भैरहेको बताए ।
