सुर्खेत । शनिबार बिहानैबाट सुर्खेतको लालागाँस्थित कर्णाली प्रदेश अस्पताल परिसरको एउटा तस्वीर सामाजिक सन्जालमा भाइरल भईरहेको छ । जसलाई सबैले दारुण तथा हृदय विदारक दृश्य भनेका छन् ।
तस्वीरमा टाउको बिनाको बच्चाको शवलाई एक कुकुरले च्यापेर अस्पताल परिसरमा हिँडिरहेको छ ।
अस्पतालका सूचना अधिकारी विनोद बस्नेतले बच्चाको शव अस्पताल हाताभित्रकै जंगलमा फालिएको र कुकुरले उठाएर हिँडेको हुनसक्ने बताए । ‘यो विषयमा छानबिन भइरहेको छ, बच्चा मरेको जन्मिएको र अस्पतालभित्रकै जंगलमा फालिएको जानकारी पाएका छौं । केहीबेरमा विज्ञप्ति नै निक्लिन्छ,’ उनले भने ।
कुकुरले च्यापेको मृत बच्चा कसको हो ? कुकुरले कहाँबाट ल्यायो ? अन्य के कस्तो हो ? भन्ने अहिलेसम्म खुल्न सकेको छैन । प्रहरी यही तस्वीरको वास्तविकताबारे जानकारी लिन जुटेको छ ।
शनिबार बिहान ७ बजे अस्पताल परिसरमा कुकुरले बच्चाको शव च्यापेर दौडिरहेको देखेपछि कुरुवा बस्न गएका स्थानीय युवा हरि कंडेलले तस्वीर खिचेका थिए । ‘बिहानै अस्पतालको फार्मेसिमा औषधि लिन गएको थिएँ । एउटा कुकुर बच्चा च्यापेर दौडिरहेको थियो । गार्डले कुकुरबाट छुट्याएर शवलाई कपडाले बेरेर राखे, अनि मान्छेको भीड लाग्यो,’ कँडेलले स्रोतलाई बताए ।
कर्णाली प्रदेश अस्पताल प्रशासनले यो विषयमा छानबिन भइरहेको जानकारी दिएको छ ।
जिल्ला प्रहरी कार्यालय सुर्खेतले पनि घटनाबारे छानबिन भइहरको बताएको छ ।
