अमेरिकामा गोली लागेको अवस्थामा दुई बालबालिकासहित चार जना नेपाली मृत भेटिए

अमेरिकाको भर्जिनियास्थित म्यानासस पार्कमा दुई बालबालिकासहित चार जना नेपाली मृत भेटिएका छन्। बिहीबार राति करिब १०:४० बजे म्यानासस पार्कस्थित लाने लेनको एक घरमा उनीहरू मृत अवस्थामा फेला परेका हुन्।

मृतकमध्ये २ वर्षिय एक बालक, ८ वर्षीया एक बालिका, ३८ वर्षीय सन्तोष परियार र ३६ वर्षीया अञ्जु श्रेष्ठ रहेका छन्। बालबालिकाको नाम भने प्रहरीले सार्वजनिक गरेको छैन।

प्रहरीका अनुसार घटनास्थलमा बन्दुक पनि फेला परेको छ। प्रारम्भिक अनुसन्धान अनुसार यो घटना सम्भवतः ‘मर्डर-सुसाइड’ (हत्या–आत्महत्या) हुनसक्ने आशंका गरिएको छ, यद्यपि कसले गोली चलायो भन्ने कुरा पुष्टि भइसकेको छैन। मृतक सबैलाई गोली लागेको प्रहरीको भनाइ छ।

घटनास्थल रहेको घरका मालिकले केही दिनदेखि सम्पर्क नभएपछि प्रहरीलाई ‘वेलफेयर चेक’ (कल्याण जाँच) गर्न अनुरोध गरेका थिए। त्यसपछि प्रहरी घरमा पुगेको र चारै जनालाई मृत अवस्थामा फेला पारेको हो।

छिमेकीहरूको अनुसार, उक्त परिवार करिब छ महिनाअघि मात्रै सो क्षेत्रमा बसाइँ सरेको थियो। एक छिमेकीले बताएका अनुसार, उनकी ८ वर्षीया छोरी मृत बालिकासँग हरेक दिन खेल्ने गर्थिन्।

प्रहरीका अनुसार, चारै जनाको शव परीक्षणका लागि म्यानाससको मेडिकल एक्जामिनरको कार्यालयमा पठाइएको छ र घटनाबारे थप अनुसन्धान भइरहेको छ।

गत वर्ष यही क्षेत्रमा भएको ममता भट्ट हत्या प्रकरण अझै टुंगोमा नपुग्दै भएको यस घटनाले नेपाली समुदायमा थप चिन्ता र त्रास फैलिएको छ।