चौकुने गाउँपालिकामा जलवायु परिवर्तन तथा विपद् व्यवस्थापन सम्बन्धी सहजीकरण कार्यक्रम सम्पन्न

सुर्खेत। सुर्खेतकाे चौकुने गाउँपालिकामा जलवायु परिवर्तन तथा विपद् व्यवस्थापन र मानवीय सहायता सम्बन्धी क्षमता अभिवृद्धि कार्यक्रम सम्पन्न भएको छ । जलवायु परिवर्तनका असर र विपद् व्यवस्थापनका उपायहरूबारे जानकारीमूलक सहजीकरण तथा अभिमुखीकरण कार्यक्रम चौकुने गाउँपालिका वडा नम्बर ८ को सभा हलमा सम्पन्न भएको छ। कार्यक्रम सोसेक नेपाल (SOSEC Nepal) को आयोजनामा तथा युनिसेफ (UNICEF) को आर्थिक सहयोगमा सम्पन्न गरिएको हो । कार्यक्रमको प्रशिक्षण तथा सहजीकरण चौकुने गाउँपालिकाका विपद् व्यवस्थापन शाखा प्रमुख श्री पदम राज शर्माले गर्नु भएको थियो।

शर्माले जलवायु परिवर्तनका कारण देखा परिरहेका प्राकृतिक विपद्—जस्तै असामान्य वर्षा, पहिरो, सुख्खा र तापक्रम वृद्धिले गाउँस्तरमा गम्भीर चुनौती उत्पन्न गरेको बताउनुभयो ।उहाँले स्थानीय समुदायले सचेतना, योजना र जोखिम न्यूनीकरणमा ध्यान केन्द्रित गर्नुपर्नेमा जोड दिनुभयो।
कार्यक्रममा सहभागीहरूले जलवायु परिवर्तनका असरहरू प्रत्यक्ष रूपमा देखिन थालेका कारण सामूहिक प्रयास र जनचेतना विस्तार अपरिहार्य रहेको धारणा व्यक्त गरेका थिए ।

उक्त कार्यक्रममा सोसेक नेपालका तेजेन्द्र दानी ,पार्बती बडुवाल ईलाका प्रहरी कार्यलयका कार्यलय प्रमुख कृ्ष्ण बहादुर बटला, ससस्त्र प्रहरी वल नेपाल गुटुका प्रमुख मीन बहादुर के सी ,बिभिन्न बिधालयका प्र अ , महिला समूहका प्रतिनिधि, विभिन्न बिधालयका बालवालिका ,युवा तथा समुदायका सरोकारवालाहरूको उल्लेखनीय उपस्थिति रहेको थियो। कार्यक्रमले स्थानीय तहमा जलवायु परिवर्तन र विपद् व्यवस्थापनसम्बन्धी चेतना अभिवृद्धि गर्न महत्वपूर्ण योगदान पुर्‍याएको आयोजक संस्थाले जनाएको छ।