जाजरकोटका वन अधिकृतमाथि कुटपिट गर्ने मुख्य अभियुक्त पक्राउ

जाजरकोट  । जिल्ला वन अधिकृतमाथि कुटपिट तथा कार्यालय तोडफोडको घटनामा संलग्न एक जना फरार अभियुक्तलाई जाजरकोट प्रहरीले पक्राउ गरेको छ। जिल्ला प्रहरी कार्यालय, जाजरकोटले भेरी नगरपालिका-७ निवासी बिराजन शाहीलाई पक्राउ गरी सार्वजनिक गरेको हो।

प्रहरीको प्रेस विज्ञप्तिअनुसार, गत जेठ २२ गते दिउँसो ४ बजे जिल्लाको भेरी नगरपालिका-३, तल्लो थाप्लेस्थित डिभिजन वन कार्यालयमा शाहीसहितको समूहले कालो मास्क लगाएर प्रवेश गरेको थियो। उनीहरूले कार्यालयमा कार्यरत जिल्ला वन अधिकृत अमर प्रसाद साहलाई हातपात गरी कुटपिट गर्नुका साथै सरकारी कागजात च्यात्ने र कार्यालयमा तोडफोड गरी फरार भएका थिए।

घटनापछि फरार रहेका शाहीको खोजी गर्ने क्रममा प्रहरीले उनलाई आज  बिहान ६ बजे नलगाड नगरपालिका-१०, रावतगाउँबाट पक्राउ गरेको हो।

पक्राउ परेका शाहीलाई आपराधिक उपद्रव सम्बन्धी कसुरमा मुद्दा दर्ता गरी अनुसन्धानका लागि सम्मानित जिल्ला अदालत, जाजरकोटबाट ७ (सात) दिनको म्याद थप गरिएको जिल्ला प्रहरी कार्यालयका सूचना अधिकारी तथा प्रहरी निरीक्षक हरि राम डाँगीले जानकारी दिनुभयो। घटनाबारे थप अनुसन्धान भइरहेको प्रहरीले जनाएको छ।