अन्तर्राष्ट्रिय नेतृत्व प्रतियोगितामा प्रथम: जाजरकाेटका हेमराज उपाध्याय दाहाल

जाजरकोटकाे छेडागाड नगरपालिका–३ निवासी हेमराज उपाध्याय दाहालले अन्तर्राष्ट्रिय बाल नेतृत्व विकास मञ्चमा प्रथम स्थान हासिल गरेका छन् । नगर बाल सञ्जालका अध्यक्षसमेत रहेका हेमराजले नेपाल, भारत, पाकिस्तान, अष्ट्रेलिया र चीनका प्रतिनिधिहरूमाझ उत्कृष्ट प्रस्तुति दिँदै नेपाललाई प्रतिनिधित्व गर्दै यो ऐतिहासिक उपलब्धि हासिल गरेका हुन् । करीब १,१४५ जना प्रतिस्पर्धीलाई पछि पार्दै उनले अन्तर्राष्ट्रिय नेतृत्व प्रतियोगितामा विजयी भई देशको नाम उच्च बनाएका छन् । हाल जनप्रिय माध्यमिक विद्यालय, दशेरा, जाजरकोटमा कक्षा १२ मा अध्ययनरत हेमराज अनुशासन, निडरता र लगनशीलताका प्रतीक मानिन्छन्। नेतृत्वको प्रारम्भिक यात्रा गाउँकै सामान्य परिवेशबाट सुरु भए पनि उनले आज अन्तर्राष्ट्रिय स्तरमा नेपाली बाल नेताको पहिचान स्थापित गर्न सफल भएका छन्।

बाल अधिकार, शिक्षा, स्वास्थ्य र सामाजिक नेतृत्वमा लामो समयदेखि सक्रिय रहेका हेमराजले भविष्यमा उत्कृष्ट जनप्रतिनिधि बन्ने लक्ष्य लिएका छन्। उनका विचार, कार्यशैली र प्रतिबद्धता आजका बालबालिका र युवापुस्ताका लागि प्रेरणादायी बनेका छन् । हेमराज भन्छन्, “संसारले मलाई चिन्ने होइन, म संसारलाई चिनाउने व्यक्ति बन्न चाहन्छु।” उनका पिता लक्ष्मीराम उपाध्याय दाहाल र माता जयनता देवी उपाध्याय दाहालको निरन्तर प्रेरणा, सहयोग र हौसलाले नै आफूलाई आजको सफलताको शिखरमा पुर्‍याएको उनी बताउँछन् । उनको यो ऐतिहासिक सफलता केवल व्यक्तिगत मात्र नभई सम्पूर्ण देशका युवाहरूका लागि आत्मविश्वास र अग्रसरतासँग अघि बढ्न मार्गदर्शन गर्ने एक प्रेरणादायी अध्याय बनेको छ।