सल्यानमा श्रीमतीमाथि हँसिया प्रहार गर्ने युवक पक्राउ

सल्यान — सामान्य विवादका क्रममा श्रीमतीमाथि हँसिया प्रहार गरी गम्भीर घाइते बनाउने एक युवकलाई प्रहरीले पक्राउ गरेको छ।

जिल्ला प्रहरी कार्यालय सल्यानका अनुसार शारदा नगरपालिका–१४ माल्नेटा घर भई हाल श्रीनगर बजारमा घर भाडामा बस्दै आएका ३२ वर्षीय दीपक कवरलाई पक्राउ गरिएको हो।

उनीमाथि आफ्नी २७ वर्षीया श्रीमती पवित्रा बुढाथोकीलाई टाउकोमा हँसिया प्रहार गरेको आरोप छ। घटनापछि गम्भीर घाइते भएकी पवित्रा बेहोस अवस्थामा रहेकी थिइन्।

प्रहरी निरीक्षक तथा सूचना अधिकारी बाबुराम बस्नेतका अनुसार प्रारम्भिक उपचारपछि उनलाई थप उपचारका लागि नेपालगञ्ज लगिएको छ।

घटनाबारे थप अनुसन्धान भइरहेको प्रहरीले जनाएको छ।