सल्यानमा तीन महिनादेखि निःशुल्क वितरण गरिने औषधिको अभाव

 सल्यान । सल्यानका अस्पताल तथा स्वास्थ्य संस्थामा तीन महिनादेखि निःशुल्क वितरण गरिने औषधिको अभाव भएको छ। उच्च रक्तचाप, मधुमेह, मानसिक रोग तथा परिवार नियोजनसम्बन्धी औषधि नपाउँदा दीर्घरोगीहरू प्रभावित बनेका छन्।

प्रदेश सरकारले हालसम्म आवश्यक औषधि आपूर्ति नगरेकाले जिल्ला अस्पताल सल्यानसहित विभिन्न पालिकाका स्वास्थ्य संस्थामा समस्या देखिएको हो। निःशुल्क उपलब्ध हुने औषधि नपाएपछि बिरामीहरू निजी मेडिकलबाट महँगो मूल्यमा औषधि खरिद गर्न बाध्य भएका छन्।

स्थानीयले नियमित सेवन गर्नुपर्ने औषधि अभाव हुँदा आर्थिक भार थपिएको र उपचार व्यवस्थापनमा कठिनाइ भएको बताएका छन्। स्वास्थ्य संस्थाहरूले भने प्रदेशस्तरबाट औषधि आपूर्ति भएपछि समस्या समाधान हुने बताएका छन्।