काठमाडौंबाट दाङ जाँदै गरेको बस कपिलवस्तुमा दुर्घटना, २९ घाइते, ३ जनाकाे अवस्था गम्भीर

 कपिलवस्तु – काठमाडौँबाट दाङतर्फ गइरहेको यात्रुबाहक बस आइतबार बिहान कपिलवस्तुमा दुर्घटनामा पर्दा २९ जना यात्रु घाइते भएका छन्। तीमध्ये तीन जनाको अवस्था गम्भीर रहेको प्रहरीले जनाएको छ।

पूर्व–पश्चिम राजमार्ग अन्तर्गत बुद्धभूमि नगरपालिका–९ वेलनदीमा बिहान ४ बजे लुम्बिनी प्रदेश ०२–००१ ख ००४५ नम्बरको बस आफैं अनियन्त्रित भई सडकको दायाँ साइडमा पल्टिएको हो।

इलाका प्रहरी कार्यालय गोरुसिङ्गेका अनुसार बस पल्टिँदा सवार यात्रुहरू घाइते भएका थिए। दुर्घटनापछि प्रहरी र ट्राफिक टोली तुरुन्तै घटनास्थलमा पुगेर घाइतेहरूको उद्धार गरी अस्पताल पठाइएको जिल्ला प्रहरी कार्यालय कपिलवस्तुका सूचना अधिकारी प्रहरी नायब उपरीक्षक मोहनमणि अधिकारीले जानकारी दिए।

हाल दुर्घटनाको कारणबारे अनुसन्धान भइरहेको प्रहरीले जनाएको छ। बसमा सवार अधिकांश यात्रु दाङतर्फ गइरहेका थिए।