भिटामिन बी–१२ को कमीले बढाउँछ नकारात्मक विचार र मानसिक समस्या

शरीरलाई स्वस्थ राख्नका लागि विभिन्न पोषक तत्व आवश्यक हुन्छन्, जसमा भिटामिन बी–१२ महत्त्वपूर्ण मानिन्छ। यसको कमीले शारीरिक मात्र नभई मानसिक स्वास्थ्यमा समेत गम्भीर असर पार्ने अध्ययनहरूले देखाएका छन्।

विशेषज्ञहरूका अनुसार भिटामिन बी–१२ ले रातो रक्तकोष र डीएनए निर्माणमा मद्दत गर्छ। साथै यसले छाला, हड्डी, स्नायु प्रणालीलाई स्वस्थ राख्ने काम गर्छ। तर यसको कमी हुँदा स्मरणशक्ति कमजोर हुनुका साथै चिन्ता, डिप्रेसन र नकारात्मक विचारहरू बढ्ने सम्भावना हुन्छ।

अनुसन्धानहरूका अनुसार भिटामिन बी–१२ मस्तिष्कमा आवश्यक रसायन उत्पादन गर्न प्रमुख हुन्छ। कमीका कारण मूड स्विङ, मानसिक स्पष्टता हराउने, थकान, सास फेर्न गाह्रो हुने, घाँटी दुख्ने जस्ता समस्या देखापर्न सक्छन्।

भिटामिन बी–१२ मुख्यतः मासु, माछा, अण्डा र डेयरी उत्पादनमा पाइन्छ। शाकाहारीका लागि भने फोर्टिफाइड ब्रेकफास्ट सिरियल, सोया वा बदामको दूधजस्ता फोर्टिफाइड बोटजन्य दूध र पोषण खमीर उत्तम स्रोत मानिन्छ।

स्वास्थ्य विशेषज्ञहरूका अनुसार भिटामिन बी–१२ को पर्याप्त मात्रा ग्रहण गर्न सकेमा शरीरमा ऊर्जा स्तर उच्च रहन्छ र मानसिक स्वास्थ्य पनि सन्तुलित रहन्छ।