सुर्खेतमा भन्सार छली सामान बरामद

सुर्खेत । जिल्ला प्रहरी कार्यालय सुर्खेतको टोलीले भन्सार छली ल्याइएको ठूलो परिमाणको मोबाइल पार्ट्ससहितका सामान बरामद गरेको छ ।

शनिबार दिउँसो भेरीगंगा नगरपालिका–५, बबई चेकपोस्टमा प्र.स.नि. हर्कबहादुर तिरुवाको कमाण्डमा खटिएको प्रहरी टोलीले नेपालगञ्जबाट आउँदै गरेको क.प्र.०२–००१ प.८४१९ नम्बरको मोटरसाइकल चेकजाँच गर्ने क्रममा ती सामान फेला पारेको हो ।

जिल्ला प्रहरी कार्यालय सुर्खेतका अनुसार बिल–भरपाई बिना भन्सार छली ल्याइएका विभिन्न सामानहरूमा १६७ थान ठूलो मोबाइल डिस्प्ले, २० थान मोबाइल चिप्स, ३० थान बटन, १० थान चार्जर, ५ थान होल्डर, ५ थान जम्पर, ५ थान मोबाइल भित्री कभर, ४० थान मोबाइल कभर, ४ थान झोल पेस्ट र ५ थान सानो मोबाइल डिस्प्ले रहेका छन् ।

बरामद गरिएका सामानहरूको अनुमानित मूल्य करिब रु.२ लाख ७१ हजार ७५० रहेको प्रहरीले जनाएको छ । बरामद वस्तुहरू आवश्यक कारबाहीका लागि बबई प्रहरी चौकीमा राखिएको प्रहरीले जनाएकाे छ ।