कोहलपुर–सुर्खेत १३२ केभी प्रशारणलाइन तिहारसम्म सम्पन्न गरिसक्नु : मुख्यमन्त्री कँडेल

सुर्खेत । कर्णाली प्रदेशका मुख्यमन्त्री यामलाल कँडेलले निर्माणाधीन कोहलपुर–सुर्खेत १३२ केभी प्रशारणलाइन तिहारभित्रै सम्पन्न गर्ने गरी काम गर्न निर्देशन दिएका छन् ।

शनिबार सुर्खेतदेखि बाँकेको कोहलपुरसम्म प्रशारणलाइन अन्तर्गतका संरचना अवलोकन गर्दै उनले स्थानीय विवाद र कानुनी जटिलताका कारण ढिलाइ भए पनि ती समस्या अब समाधान भइसकेकाले निर्माणमा ढिलाइ अस्वीकार्य हुने चेतावनी दिए ।

“मौसम प्रतिकूलतालाई कारण देखाएर अब धेरै समय ढिलाइ गर्ने छुट छैन । जतिसक्दो छिटो प्रशारणलाइनको काम सम्पन्न गर्नुस् । प्रदेश वा संघीय सरकारबाट आवश्यक निर्णय वा सहकार्य चाहिने भए जानकारी गराउनुस्,” मुख्यमन्त्री कँडेलले भने ।

उनले सुर्खेत र कोहलपुरस्थित सबस्टेशन, गाभर क्षेत्रमा बनेका टावर, बाँके र बर्दिया राष्ट्रिय निकुञ्ज क्षेत्रमा निर्माणाधीन संरचनाको अवलोकन गर्दै कर्मचारीसँग छलफल गरेका थिए । चिसापानी गाभरमा भएको छलफलमा संघीय वन तथा वातावरण मन्त्री ऐनबहादुर शाही पनि सहभागी थिए ।

मन्त्री शाहीले पनि आयोजनालाई उच्च प्राथमिकतामा राखिएको उल्लेख गर्दै मन्त्रालयतर्फबाट गर्नुपर्ने काम तत्काल पूरा गर्ने आश्वासन दिए । “बाँकी केही समस्या देखिएमा मन्त्रालय वा मन्त्रिपरिषद्सम्म लैजान तयार छौँ,” उनले भने ।

बर्दिया राष्ट्रिय निकुञ्जका वार्डेन अशोक रामले रुख कटान र ढुवानीमा ढिलाइ नगर्ने प्रतिवद्धता जनाए । आयोजनाका प्रमुख रवि चौधरीका अनुसार १६२ टावरमध्ये तीनवटा मात्रै बाँकी छन् भने करिब १० किलोमिटर लाइन तान्न बाकी छ । बाँकेको बानियाँभारमा खेतमा पानीका कारण टावरको जग खन्न ढिलाइ भए पनि पानी घटेसँगै काम तीव्र गतिमा अघि बढाइने उनले जानकारी दिए ।

यसअघि बाँकेको बानियाँभार, गाभर र सुर्खेतको सुब्बाकुनामा मुआब्जा विवादका कारण काम रोकिएको थियो । सरकारले राष्ट्रिय प्राथमिकताप्राप्त आयोजनाका लागि मुआब्जा नीतिमा परिवर्तन गरेपछि विवाद समाधान भएको हो ।

५२ किलोमिटर लामो यो प्रशारणलाइन बाँकेको कोहलपुरबाट सुरु भई सुर्खेतको वीरेन्द्रनगर–११ सुब्बाकुना सबस्टेशनमा टुंगिनेछ । आयोजनाले भौगोलिक जटिलता भएका स्थानमा ड्रोनमार्फत तार तान्ने तयारी समेत गरेको छ ।