एमाले सचिवालयका तीन निर्णय: राहदानी रोक्का सिफारिस र गृह निर्देशनप्रति कडा आपत्ति

नेकपा (एमाले) सचिवालय बैठकले हालै तीनवटा महत्वपूर्ण निर्णय सार्वजनिक गरेको छ। पार्टी अध्यक्ष केपी शर्मा ओलीको अस्थायी निवास गुण्डुमा आइतबार बसेको बैठकमा भदौ २३ र २४ गतेका घटनासम्बन्धी जाँचबुझ आयोगको सिफारिसप्रति गम्भीर ध्यानाकर्षण गरिएको छ। आयोगले अध्यक्ष ओलीसहित केही व्यक्तिहरूको राहदानी रोक्का गर्न सिफारिस गरेको विषयमा बैठकले कडा आपत्ति जनाएको छ।

बैठकले गृह मन्त्रालयमार्फत मिडिया ट्रायल गरिएको र दसैँको अवसर पारेर राजनीतिक प्रतिशोध साँधिएको भन्दै आपत्ति प्रकट गरेको छ। बैठकपछि जारी विज्ञप्तिमा भनिएको छ, “दसैँको अवसर पारेर गरिएको राजनीतिक प्रतिशोधपूर्ण कदमप्रति सचिवालय गम्भीर आपत्ति प्रकट गर्दछ। यस्ता निर्णयहरूले आयोगकै विश्वसनीयता प्रश्नमा पारिएको छ।”

दोस्रो निर्णयमा एमालेले गृह मन्त्रालयले नेपाल प्रहरीलाई दिएको पछिल्लो निर्देशनप्रति असन्तुष्टि जनाएको छ। मन्त्रालयले भदौ २४ को घटनामा संलग्न दोषीहरूमाथि कारबाही नगरी जाँचबुझ आयोगकै अधिकार क्षेत्रभित्र राख्ने आदेश दिएकोप्रति एमालेको आपत्ति छ। विज्ञप्तिमा भनिएको छ, “यस निर्देशनले प्रहरीको कानुनी अधिकारमाथि हस्तक्षेप मात्र गरेको छैन, अपराधीलाई संरक्षण र प्रोत्साहन दिने आपत्तिजनक मनसाय बोकेको छ।”

तेस्रो निर्णयमा बैठकले पछिल्लो राजनीतिक परिस्थिति मूल्याङ्कन गर्न र आवश्यक निर्णय लिन पार्टीको केन्द्रीय कमिटीको दसाैँ बैठक बोलाउने निर्णय गरेको छ। यो बैठक असोज २७ देखि २९ गतेसम्म काठमाडौंमा बस्नेछ भने सचिवालयको अर्को बैठक असोज १९ र २० गते काठमाडौंमै हुने भएको छ।