भेरीगंगा–१ का वडा अध्यक्ष पुलामीको घर मध्यरातमा अपरिचित समूहद्वारा घेराउ 

दुर्गा खड्का, सुर्खेत । सुर्खेतको भेरीगंगा नगरपालिका–१ का वडा अध्यक्ष दिनेश पुलामीको घरमा मध्यरातमा अपरिचित समूहले घेराउ गरेको आरोप लागेको छ।

अध्यक्ष पुलामीका अनुसार बुधबार राति करिब १२ बजे भेरीगंगा नगरपालिका–४ को बाउनचौर टोलस्थित उनको घरमा ४/५ जनाको अपरिचित समूह मोटरसाइकलसहित पुगेको थियो। उक्त समूह घर वरिपरि बसेको र त्यसबेला आफू घरभित्र सुतिरहेको उनले बताएका छन्।

घटना भएको समयमा घरमा उनका १० वर्षीय छोरा भुवन पुलामी र वडा सदस्य टोप बहादुर गुरुङ पनि सँगै रहेको अध्यक्ष पुलामीले जानकारी दिएका छन्। उनले अवस्था संवेदनशील बनेपछि संयम अपनाउँदै आफू र परिवारको सुरक्षा गरेको बताएका छन्।

घटनापछि असुरक्षा महसुस भएको भन्दै अध्यक्ष पुलामीले बिहीबार इलाका प्रहरी कार्यालय छिन्चुमा उजुरी दिएका छन्।