आसामविरुद्धको टी-२० सिरिज नेपाल ‘ए’ले जित्यो

भारतको गुवाहाटीमा सम्पन्न पाँच खेलको टी–२० सिरिज नेपाल ‘ए’ले ३–२ ले जितेको छ। सोमबार भएको पाचौं तथा निर्णायक खेलमा नेपालले आसामलाई ४४ रनले पराजित गर्दै सिरिज आफ्नो पक्षमा पारेको हो।

पहिला ब्याटिङ गरेको नेपाल ‘ए’ले निर्धारित २० ओभरमा ५ विकेट गुमाएर २०८ रनको विशाल योगफल बनायो। सन्दीप जोराले ३९ बलमा ६४ रन प्रहार गर्दै टिमलाई बलियो आधार दिए। शुभ कंसाकारले ४१, इशान पाण्डेले ३२ र आदिल अन्सारीले २५ रन जोडे।

जवाफमा २०९ रनको लक्ष्य पछ्याएको आसाम २० ओभरमा ९ विकेट गुमाउँदै १६४ रनमा सीमित भयो। नेपालका पवन सर्राफ, शेर मल्ल र आकाश चन्दले समान दुई-दुई विकेट हात पारे भने बसिर अहमद र आदिल अन्सारीले एक-एक विकेट लिए।

यसअघि सिरिजको पहिलो खेलमा नेपाल ‘ए’ डिएलएस प्रणालीमार्फत १५ रनले पराजित भएको थियो। दोस्रो खेलमा ९६ रनको फराकिलो जित निकालेको नेपाल ‘ए’ले तेस्रो खेलमा ९ रनले जित हासिल गरेको थियो। चौथो खेलमा भने नेपाल १८ रनले पराजित भएको थियो।

पाँचौं खेल जितेसँगै नेपाल ‘ए’ले सिरिज ३–२ को नतिजासहित आफ्नो पक्षमा पार्न सफल भएको हो।