कर्णालीमा मर्यादित महिनावारी व्यवस्थापनबारे संवाद कार्यक्रम सम्पन्न

सुर्खेत । कर्णाली प्रदेशमा मर्यादित महिनावारी व्यवस्थापनको वर्तमान अवस्था, चुनौती, अवसर तथा आगामी कार्यदिशाबारे बहुपक्षीय छलफल गर्ने उद्देश्यले “महिनावारी संवाद” कार्यक्रम सम्पन्न भएको छ।

मर्यादित महिनावारी व्यवस्थापन कर्णाली सञ्जाल (कदम) को आयोजनामा कर्णाली प्रदेश सरकारको समन्वय तथा विभिन्न साझेदार संस्थाको सहकार्यमा कार्यक्रम सञ्चालन गरिएको थियो। कार्यक्रममा कदम सञ्जालका अध्यक्ष घनश्याम केसीको अध्यक्षता, सामाजिक विकास मन्त्री घनश्याम भण्डारीको प्रमुख आतिथ्यता तथा जलस्रोत तथा ऊर्जा मन्त्री विजया बुढाको विशेष आतिथ्यता रहेको थियो।

कार्यक्रममा “महिनावारी स्वास्थ्य तथा न्याय सम्बन्धी स्वीकृत मार्गदर्शन, २०८२” सम्बन्धी प्रस्तुति प्रस्तुत गरिएको थियो। साथै महिनावारीसम्बन्धी चेतना अभिवृद्धि गर्ने उद्देश्यले तयार गरिएको टेलिशृंखला टुटेको सांग्लो समेत प्रदर्शन गरिएको थियो।

संवादमा स्वास्थ्यकर्मी, सरोकारवाला संस्था, पत्रकार, युवा प्रतिनिधि तथा अभियन्ताहरूले महिनावारी व्यवस्थापनसँग सम्बन्धित चुनौती, कार्यान्वयनका सम्भावना र सुझावहरू प्रस्तुत गरेका थिए।

कार्यक्रमका प्रमुख अतिथि सामाजिक विकास मन्त्री भण्डारीले मर्यादित महिनावारी व्यवस्थापनलाई मानव अधिकार र सम्मानसँग जोडिएको विषय भएको उल्लेख गर्दै प्रदेश सरकार आवश्यक सहयोगका लागि प्रतिबद्ध रहेको बताए।