मुगुमा अत्यधिक रक्तस्रावका कारण सुत्केरीको मृत्यु

मुगु। मुगु जिल्लाको सोरु गाउँपालिका–८ रुमा गाउँकी ३४ वर्षीया सुनिता बुढाको सुत्केरीपछिको उपचारका क्रममा मृत्यु भएको छ।

बुधबार बिहान घरमै छोरा जन्माएकी बुढाको सालनाल नझरेपछि उनलाई सीप प्रसूति केन्द्र लगिएको थियो। जिल्ला प्रहरी कार्यालय मुगुका अनुसार अत्यधिक रक्तस्राव भएपछि जिल्ला अस्पताल पुर्‍याइएका बुढाको बिहीबार बिहान ३ बजे उपचारका क्रममा निधन भएको हो।

जिल्ला अस्पतालमा ब्लड बैंक नहुँदा तत्काल रगत अभाव भएकाले जटिलता बढेको उपचारमा संलग्न चिकित्सकहरूले बताएका छन्। पछि युवाहरूले रगत उपलब्ध गराए पनि थप उपचारका लागि सुविधासम्पन्न अस्पताल लैजाने तयारीमै उनको मृत्यु भएको हो।