कर्णालीमा ‘राउटे करिडोर’ निर्माण हुँदै

सुर्खेत – कर्णाली प्रदेश सरकारले लोपोन्मुख फिरन्ते राउटे समुदायको संरक्षणका लागि ‘राउटे करिडोर’ निर्माण गर्ने भएको छ। चालु आर्थिक वर्ष २०८२/८३ भित्र निर्माण हुने करिडोर राउटे नीति, समन्वय समितिको प्रतिवेदन, संवैधानिक आयोगको सिफारिस र विगत १० वर्षको बसोबास स्थलको नक्सांकनका आधारमा बन्ने भएको हो।

दैलेख, सुर्खेत, सल्यानलगायतका वन क्षेत्रमा अस्थायी बसोबास गर्ने राउटेलाई करिडोरमार्फत पोषणयुक्त खाद्य सामग्री, निःशुल्क स्वास्थ्य सेवा, शैक्षिक सामग्री वितरण र क्षमता विकास कार्यक्रम उपलब्ध गराइनेछ। साथै, संरक्षणका लागि समयानुकूल कानुनी प्रबन्ध र प्रोफाइल प्रकाशन गर्ने तयारी छ।

सामाजिक विकास मन्त्री घनश्याम भण्डारीले राउटे समुदाय नेपालको मौलिक सांस्कृतिक सम्पदा भएकाले उनीहरूको संरक्षण र सशक्तीकरण राज्य र समाज दुवैको जिम्मेवारी भएको बताए। उनले परम्परा र स्वतन्त्रताको सम्मान गर्दै विकासको मार्ग तय गर्न चुनौती रहेको उल्लेख गरे।

हाल कल्याल, सोवंशी र रास्कोटी गरी तीन थरका राउटे समुदायको संख्या १३५ छ। काठका सामग्री विनिमय गरेर जीविका चलाउने, कृषि वा स्थायी रोजगारीमा संलग्न नभएको यो समुदाय मौखिक परम्परा, गीत र नृत्यमार्फत सांस्कृतिक अभिव्यक्ति गर्छ।