कर्णाली पर्यटन पत्रकार मञ्च गठन, अध्यक्षमा खड्का

सुर्खेत — कर्णालीको पर्यटन सम्भावना खोजी र यसको प्रवर्द्धन, विकास तथा प्रचार–प्रसार गर्ने उद्देश्यले कर्णाली पर्यटन पत्रकार मञ्च गठन गरिएको छ। शनिबार सुर्खेतको काँक्रेविहार परिसरमा आयोजित कार्यक्रममा पत्रकार सुशीलकुमार खड्काको अध्यक्षतामा नौ सदस्यीय कार्यसमिति चयन गर्दै मञ्च स्थापना गरिएको हो।

जिल्ला प्रशासन कार्यालय सुर्खेतमा दर्ता भएको मञ्चको उपाध्यक्षमा सिर्जना बुढाथोकी, महासचिवमा ओमबहादुर शाही, सचिवमा रजनीकुमारी योगी र कोषाध्यक्षमा नविनकुमार सुवेदी निर्वाचित भएका छन्। सदस्यमा मिमबहादुर रावल (रमेश), जगतदल जनाला विक, खगेन्द्र शाही र चन्दा कँडेल रहेका छन्।

महासचिव शाहीका अनुसार मञ्चले अध्ययन, अनुसन्धान र अवलोकनमार्फत कर्णालीका पर्यटकीय गन्तव्यको पहिचान गरी राष्ट्रिय तथा अन्तर्राष्ट्रिय स्तरमा प्रचार–प्रसार गर्ने लक्ष्य राखेको छ। ‘पर्यटन प्रवर्द्धनमा पत्रकारको क्षमता विकास गर्दै कर्णालीलाई पर्यटकको रोजाइको गन्तव्य बनाउने हाम्रो मूल उद्देश्य हो,’ उनले भने।

अध्यक्ष खड्काले कर्णालीका प्राकृतिक र सांस्कृतिक पर्यटकीय स्थल पूर्वाधार र प्रचार–प्रसारको अभावमा ओझेलमा परेको बताउँदै मञ्चमार्फत सम्भावना उजागर गर्ने प्रतिवद्धता जनाए। ‘पर्यटन पत्रकारितामार्फत कर्णालीलाई संसारभर चिनाउने र नीतिगत सुधारका लागि पैरवी गर्ने हाम्रो दायित्व हो,’ उनले भने।