एएफसी यू-२० महिला एशियन कप छनोट : आज नेपाल र उत्तर कोरियाकाे भिडन्त

काठमाडौँ – एएफसी यू-२० महिला एशियन कपको छनोटमा नेपालले आज समूह चरणको अन्तिम खेलमा उत्तर कोरियासँग भिड्ने भएको छ। भुटानको चाङ्लिमिथाङ रङ्गशालामा हुने खेल नेपाली समयअनुसार दिउँसो पौने २ बजे सुरु हुनेछ।

एशियन कपमा स्थान बनाउन नेपालका लागि आजको खेल जित्नैपर्ने अवस्था छ। समूह ‘ए’ मा उत्तर कोरिया शीर्ष स्थानमा रहँदै दुई खेलबाट पुरा छ अंक बटुलेको छ। उसले पहिलो खेलमा साउदी अरबलाई १५–० ले तथा दोस्रो खेलमा भुटानलाई १०–० ले पराजित गरेको थियो।

नेपालले भने पहिलो खेलमा भुटानसँग १–१ को बराबरी खेलेको थियो भने दोस्रो खेलमा साउदी अरबलाई १–० ले हराएको छ। यससँगै नेपालले दुई खेलबाट चार अंक जोडेको छ।

समूह ‘ए’ बाट एशियन कपमा पुग्ने टोली आजको खेलपछि टुङ्गो लाग्नेछ। छनोटमा सहभागी ३२ देश आठ समूहमा विभाजित छन्। प्रत्येक समूहको विजेता आठ टोली र उत्कृष्ट तीन उपविजेताले आउँदो वर्ष थाइल्यान्डमा हुने २० वर्षमुनिको एशियन कपमा स्थान बनाउने छन्।