कर्णालीमा तीन दिनसम्म प्रदेश स्थापना तथा शहीद दिवस मनाइने

सुर्खेत— कर्णाली प्रदेशमा यस वर्षको प्रदेश स्थापना तथा शहीद दिवस–२०८२  तीन दिनसम्म विशेष कार्यक्रमसहित मनाइने भएको छ । आज बसेको मन्त्रिपरिषद् बैठकले आगामी भदौ ३, ४ र ५ गते तीन दिनसम्म दिवस मनाउने निर्णय गरेको हो । यसका लागि मुख्यमन्त्री यामलाल कँडेलको संयोजकत्वमा मूल समारोह समिति गठन गरिएको सरकारका प्रवक्ता विनोदकुमार शाहले जानकारी दिए।

२०७२ साल भदौ ४ गते साविक कर्णाली अञ्चलसहित भेरी अञ्चलका सुर्खेत, दैलेख, जाजरकोट र राप्ती अञ्चलका सल्यान तथा रुकुमपश्चिम जिल्ला समेटी कर्णाली प्रदेशको स्थापना भएको थियो । यसअघि २०७२ भदौ २३ गते प्रमुख चार राजनीतिक दलका शीर्ष नेताहरू सम्मिलित संविधानसभाको विशेष समितिले ६ प्रदेशको सीमाङ्कनसहितको संघीयताको खाका सार्वजनिक गरेपछि भएको आन्दोलनमा चार जनाले ज्यान गुमाएका थिए । आन्दोलनको उत्कर्षपछि कर्णाली प्रदेश कान्छो प्रदेशका रूपमा जन्मिएको हो ।