जाजरकोटमा सट्टा परीक्षा दिएर फरार रहेका अभियुक्त बाँकेबाट पक्राउ

जाजरकोट। शिक्षा ऐन सम्बन्धी कसुरमा फरार रहेका एक अभियुक्तलाई जाजरकोट प्रहरीले बाँकेबाट पक्राउ गरेको छ। जिल्ला प्रहरी कार्यालय जाजरकोटका अनुसार सट्टा परीक्षा दिएको आरोपमा फरार रहेका बाँकेको बैजनाथ गाउँपालिका-३ का ३७ वर्षीय निखिल बैगारलाई शुक्रबार बिहान उनकै घरबाट पक्राउ गरिएको हो।

अख्तियार दुरुपयोग अनुसन्धान आयोगले इलाका प्रहरी कार्यालय कोहलपुरमार्फत बैगारविरुद्ध शिक्षा ऐन सम्बन्धी कसुर (सट्टा परीक्षा) मुद्दामा जाहेरी दिएको थियो। जाहेरीपछि उनी फरार रहँदै आएका थिए।

जिल्ला प्रहरी कार्यालय जाजरकोटका सूचना अधिकारी एवं प्रहरी निरीक्षक हरि राम डाँगीका अनुसार जिल्ला प्रशासन कार्यालय जाजरकोटबाट गत असार ३१ गते पक्राउ अनुमति लिएर बैगारको खोजी कार्य तीव्र पारिएको थियो। खोजतलासका क्रममा उनी बाँकेमा रहेको खुलेपछि प्रहरीले उनलाई पक्राउ गरेको हो।

पक्राउ परेका बैगारलाई जाजरकोट ल्याई जिल्ला प्रशासन कार्यालयबाट ५ दिनको म्याद थप गरी हिरासतमा राखेर थप अनुसन्धान भइरहेको प्रहरीले जनाएको छ।