इनर ह्वील क्लब अफ सुर्खेत भ्यालीको चौथो पद हस्तान्तरण कार्यक्रम सम्पन्न

इनर ह्वील क्लब अफ सुर्खेत भ्यालीले आफ्नो चौथो पद हस्तान्तरण (Installation Ceremony) कार्यक्रम सम्पन्न गरेको छ। वीरेन्द्रनगर स्थित होटेल नमस्ते नेपालमा आयोजित कार्यक्रममा क्लबका २०२४/२५ का कार्यसमिती लाई बिदाइ र  २०२५/२६ का नयाँ कार्यसमिति स्वागत गरिनुका साथै बर्ष २०२४/२५ का अध्यक्ष इन्नर व्हिल रश्मि शाक्य ज्युले बार्षिक प्रतिवेदन प्रस्तुत गर्नु भएको थियो। त्यसैगरी पद हस्तान्तरण कार्यक्रममा २०२५/२६ का अध्यक्ष इन्नर व्हिल कृष्णा शाहीले आफ्नो यस बर्षको थिममा रहेर सम्पन्न गर्न सकिने कार्यक्रमका योजनाहरू प्रस्तुत गर्नु भएको थियो। कार्यक्रममा प्रमुख अतिथीका रुपमा प्रदेश अस्पताल व्यवस्थापन विभाग प्रमुख अनिता ज्ञवाली रहनु भएको थियो भने विशिष्ट अतिथी इन्नर व्हिल क्लब अफ सुर्खेत भ्यालीका संस्थापक अध्यक्ष इन्नर व्हिल लक्ष्मी कार्की प्रधान( सिया) रहनु भएको थियो।

पद हस्तान्तरण कार्यक्रममा भारतमा जन्मनु भइ लामो समय देखि नेपालमा र विशेष गरेर सुर्खेतमा रहेर सामाजिक सेवा गरिरहनु भएका नवज्योति स्कुलका संस्थापक सिस्टर रोसिता लाई सम्मान समेत गरिएको थियो। सुर्खेत स्थित विभिन्न सामाजिक संघ संस्थाका प्रमुख तथा प्रतीनिधि, संचारकर्मी लगायतको उपस्थिति रहेको कार्यक्रम “Step up & Lead by Example” भन्ने अन्तर्राष्ट्रिय मूल नाराका साथ संचालन गरिएको थियो । कार्यक्रममा प्रमुख अतिथि, विशेष अतिथि तथा अतिथिज्यूहरूले क्लबले सामाजिक सेवाका क्षेत्रमा पुर्‍याएको योगदान र स्वास्थ्य, शिक्षा, महिला सशक्तिकरण, बालबालिकाको संरक्षण लगायत विविध क्षेत्रमा खेलिरहेको भूमिकाका बारेमा प्रशंसा गर्नुभएकाे थियाे ।

नव-निर्वाचित अध्यक्ष इन्नर व्हिल कृष्णा शाहीले आफ्नो कार्यकालमा सामाजिक रूपान्तरणका लागि अझ प्रभावकारी र समर्पित कार्यक्रमहरू सञ्चालन गर्ने प्रतिबद्धता व्यक्त गर्नु भएको थियो। इनर ह्वील क्लब अफ सुर्खेत भ्याली  डिष्ट्रिक्ट ३५० अन्तर्गत क्रियाशील महिला स्वयंसेवी संस्थामध्ये एक हो, जसले निरन्तर रूपमा विभिन्न सामाजिक सेवाका कार्यक्रम र फेलोशिप कार्यक्रमहरू सञ्चालन गर्दै आएको छ। यस पद हस्तान्तरण समारोहले आगामी वर्षको कार्यदिशा तय गर्न र क्लब सदस्यहरूमा नयाँ ऊर्जा भरिदिएको सहभागीहरूको भनाइ थियो ।