- साउन ७, २०८२
- No Comment
- 62
मधेश प्रदेशका ८ जिल्ला तीन महिनाका लागि विपत् संकटग्रस्त घोषणा

साउन ७ । लगातारको खडेरी र अनावृष्टि (धेरै समयसम्म वर्षा नहुनु) का कारण मधेश प्रदेशका आठ जिल्ला तीन महिनाका लागि विपत् संकटग्रस्त घोषित भएका छन् । बुधबार बसेको मन्त्रिपरिषद् बैठकले आगामी तीन महिनासम्म ती जिल्लामा विशेष आपतकालीन अवस्था लागू गर्ने निर्णय गरेको हो ।
खानेपानी, सिँचाइ तथा बाली उत्पादनमा परेको असरलाई ध्यानमा राख्दै सरकारले यो निर्णय लिनुपरेको खानेपानी मन्त्री प्रदीप यादवले जानकारी दिए । उनका अनुसार लामो समयदेखि वर्षा नहुनुका कारण खेतबारी सुक्खा हुन थालेका छन् भने भूमिगत पानीका स्रोतसमेत सुकेको छ । यसले सर्वसाधारणको दैनिकी प्रभावित भएको छ र खानेपानीको अभाव पनि देखिन थालेको छ ।
सरकारको भनाइमा, संकटग्रस्त क्षेत्र घोषणा भएपछि राहत, उद्धार र पुनःस्थापना कार्यलाई संघ, प्रदेश र स्थानीय तहबीच समन्वय गरेर अघि बढाइनेछ। प्रभावित जिल्लाहरूको नाम र कार्यान्वयन योजनाबारे चाँडै विस्तृत विवरण सार्वजनिक गरिने मन्त्रालय ले जनाएको छ ।
सरकारले भनेको छ कि अबको केही दिनभित्रै सम्बन्धित जिल्लाहरूमा राहत सामग्री, सुरक्षित पानीको आपूर्ति, र सिँचाइका लागि वैकल्पिक व्यवस्था सुनिश्चित गरिनेछ । वर्षा नभएसम्मको अवस्थालाई ध्यानमा राख्दै सम्भावित खतराहरू न्यूनीकरण गर्न सबै निकायलाई तयारी अवस्थामा रहन भनिएको छ ।