साँठगाँठको षड्यन्त्र

लेखक – निडर चदारा।

अँध्यारो कोठामा
दुई छायाँ भेटिन्छन्,
जनताको सपना चोर्ने
नक्सा कोर्छन्।

एक छायाले भन्छ —
“सत्ता मेरो हातमा छ।”
अर्को छायाले भन्छ —
“पैसाको झोला मेरो घरमा पुग्नुपर्छ।”

दुबै हाँस्छन् —
“जनताको आँसु हाम्रो गहना हो,
क्रान्तिको आवाज
हाम्रो लागि खतरा हो।”

त्यसैले
विद्रोहको नाम धारण गर्ने मान्छे
षड्यन्त्रको निशाना हुन्छ,
दलालहरूको सौदा
उसको विरोधमा हुन्छ।

यो विरोध
न विचारको कारण हो,
न जनताको मागको कारण हो।
यो विरोध
साँठगाँठको व्यापार हो,
षड्यन्त्रको खेल हो।

तर हे छायाहरू !
इतिहासले देखिसकेको छ —
जनताको समुद्रलाई
षड्यन्त्रले रोक्न सक्दैन।
सहिदको रगतलाई
दलालीको सौदाले मेट्न सक्दैन।

आज तिमीहरूले
क्रान्तिको नाम मेट्ने खेल खेल्छौ भने,
भोलि जिउदो चिहान हुन्छौ
जनताको आँधी आउँछ —
र साँठगाँठको महल
ध्वस्त हुन्छ। ध्व्स्त हुन्छ।