रवि लामिछानेमाथि राजनीतिक प्रतिशोध राखेकाे भन्दै  दैलेखमा पनि रास्वपाकाे  हस्ताक्षर अभियान  

दैलेख। राष्ट्रिय स्वतन्त्र पार्टीका सभापति रवि लामिछानेमाथि राज्यबाट भएको राजनीतिक प्रतिशोधको विरोधमा दैलेख जिल्लाको सदरमुकाममा हस्ताक्षर अभियान सुरु गरिएको छ। यसअघि जिल्लाका विभिन्न पालिकामा सञ्चालनमा आएको यो अभियान सदरमुकाममा भने पहिलोपटक औपचारिक रूपमा सुरु गरिएको हो। अभियानको सुरुआत ८२ वर्षीय एकजना जेष्ठ नागरिकबाट गरिएको थियो। रास्वपाले लामिछानेमाथि राज्यका विभिन्न निकायमार्फत दमन, अत्याचार र प्रतिशोध गरिएको आरोप लगाउँदै देशव्यापी रूपमा हस्ताक्षर सङ्कलन अभियान सञ्चालन गरिरहेको छ।

दैलेख जिल्लाको अभियानको सन्दर्भमा रास्वपा दैलेखका सचिव प्रकाश बुढाले आम नेपाली जनतालाई देश तथा विदेशबाट पनि सक्रिय भई अभियानमा सहभागी हुन अपिल गरेका छन्। उनले लामिछानेमाथि भइरहेको राजनीतिक हस्तक्षेपलाई अस्वीकार्य भन्दै जनमतको दबाब सिर्जना गर्न हस्ताक्षर अभियान प्रभावकारी माध्यम भएको बताए । उक्त अभियानमा स्थानीय तहका नागरिक, युवा तथा रास्वपाका कार्यकर्ताहरूको उल्लेखनीय सहभागिता देखिएको छ। पार्टीले आगामी दिनमा हस्ताक्षर संकलनपछि त्यसलाई संघीय सरकारसामु बुझाउने जनाएको छ।