आजको मौसम: कोशी र बागमतीमा हल्कादेखि मध्यम वर्षा 

साउन ५ – कोशी र बागमती प्रदेशका केही स्थानमा हल्कादेखि मध्यम वर्षा भएको छ। मौसम पूर्वानुमान महाशाखाका अनुसार कोशी प्रदेशको झापा तथा बागमती प्रदेशको नुवाकोट र सिन्धुपाल्चोक आसपासका क्षेत्रमा वर्षा भएको हो।

महाशाखाले आज देशका अधिकांश स्थानमा मेघगर्जन र चट्याङसहित पानी पर्ने सम्भावना रहेको जनाएको छ। विशेष गरी बागमती र गण्डकी प्रदेशका एक/दुई स्थानमा भारी वर्षा हुने सम्भावना रहेको महाशाखाले उल्लेख गरेको छ।

शनिवार बेलुकीदेखि सक्रिय भएको मनसुनी प्रणालीबाट व्यापक वर्षाको अपेक्षा गरिएको थियो। तर पूर्वानुमानअनुसार पर्याप्त पानी पर्न नसक्दा प्रणाली कमजोर बनेको मौसमविद्हरू बताउँछन्।

कोशी प्रदेशमा झापा र धनकुटा, गण्डकी प्रदेशमा कास्की तथा सुदूरपश्चिम प्रदेशमा कञ्चनपुर लगायत सीमित स्थानमा मात्र ठूलो पानी परेको छ। समग्रमा भने औसतमा मध्यम वर्षा मात्र भएपछि मनसुनी गतिविधि कमजोर देखिएको हो।

मनसुन सुरु भएयता मधेश प्रदेशमा अत्यन्तै कम पानी परेको छ। यसपटक पनि पर्याप्त वर्षा हुन नसकेकाले सिँचाइ सुविधाविहीन खेतहरू बाँझो छन्। वर्षा नहुँदा मध्यपहाडका धेरै स्थानमा पनि अझै रोपाइँ सुरु हुन सकेको छैन।

यस वर्ष मनसुन सामान्यभन्दा बढी सक्रिय रहने अनुमान गरिएको थियो। तर डेढ महिनासम्मको अवधिमा अपेक्षितजति वर्षा हुन सकेको छैन। मौसमविद्हरुले तीन–चार पटक भारी वर्षाको चेतावनी दिएका भए पनि देशका धेरै स्थानमा पानी पर्न सकेन।

यद्यपि, अझै झण्डै साढे दुई महिना मनसुन बाँकी रहेको हुँदा आगामी दिनमा ठूलो पानी पर्ने सम्भावना रहेको मौसमविद्हरू बताउँछन्। मौसमविद् नारायण अर्यालका अनुसार, “सक्रिय प्रणाली विकसित भएमा अझै पनि पर्याप्त वर्षाको सम्भावना खुला छ।”

कृषकहरूले भने आकाश तिर हेरेर अझैपनि मनसुनले साथ दिन्छ भन्ने आशा बोकेका छन्।