अस्पतालहरूमा आज आकस्मिक बाहेकका सेवा बन्द

नेपाल चिकित्सक संघको आह्वानमा आज देशभरका अस्पताल तथा स्वास्थ्य संस्थामा आकस्मिक बाहेकका सम्पूर्ण सेवा बन्द भएको छ । उपचारमा लापरबही गर्ने चिकित्सक र अस्पतालहरूलाई उपभोक्ता अदालतले क्षतिपूर्ति तिराउन थालेपछि रुष्ट भएका चिकित्सकले आन्दोलन गरेका हुन् ।

चिकित्सक आन्दोलनको कारण काठमाडौँका ठूला सरकारी अस्पतालहरुमा पनि आज आकस्मिक बाहेकका सेवा ठप्प छन् । ललितपुरको पाटन अस्पताल, काठमाडौँको वीर अस्पताल, टिचिङ सहितका अस्पतालमा पनि आज आकस्मिकबाहेकका बिरामीले उपचार सेवा पाएका छैनन् । चिकित्सकले उपचार सेवा बहिष्कार गर्दा बिरामीहरु मर्कामा परेका छन् । नेपाल चिकित्सक संघको आह्वानमा भएको यो आन्दोलनमा चिकित्सकका अन्य नौवटा स्वास्थ्य संस्थाले पनि एक्यवद्धता जनाएका छन् ।