१८औं गणतन्त्र दिवसको अवसरमा दैलेखमा रक्तचाप तथा मधुमेह परीक्षण कार्यक्रम सम्पन्न

दैलेख। १८औं गणतन्त्र दिवस २०८२ को विशेष अवसरमा नारायण नगरपालिकाको आयोजनामा रक्तचाप तथा मधुमेह परीक्षण कार्यक्रम सम्पन्न गरिएको छ। जनस्वास्थ्यप्रति ध्यान दिँदै आयोजना गरिएको उक्त स्वास्थ्य परीक्षण कार्यक्रम दैलेख जिल्लाको जिल्ला समन्वय समितिको परिसरमा सम्पन्न भएको हो।

स्वास्थ्य सचेतना अभिवृद्धि र जनस्वास्थ्य प्रवर्द्धनको उद्देश्यसहित आयोजित कार्यक्रममा १०० भन्दा बढी स्थानीय आम नागरिकहरूले निशुल्क रक्तचाप र मधुमेह परीक्षण गराएका थिए।

स्थानीयवासीको उत्साहजनक सहभागिता रहेको उक्त कार्यक्रममा सहभागीहरूले नियमित स्वास्थ्य परीक्षणको आवश्यकताबारे जानकारी समेत प्राप्त गरेका थिए। नारायण नगरपालिकाका जनप्रतिनिधिहरूले यस्ता कार्यक्रमले नागरिकमा स्वास्थ्यप्रति सचेतना बढाउने विश्वास व्यक्त गरेका छन्।

नगरपालिकाले आगामी दिनमा पनि यस्ता कार्यक्रमलाई निरन्तरता दिने जनाएको छ।