- जेष्ठ १५, २०८२
- No Comment
- 31
आज यी प्रदेशमा चट्याङसहित वर्षाको सम्भावना

काठमाडौं। हाल देशभर पश्चिमी वायु, स्थानीय वायु तथा बङ्गालको खाडीबाट आएको जलवाष्पयुक्त हावाको प्रभावले गर्दा विभिन्न प्रदेशमा चट्याङसहित वर्षाको सम्भावना देखिएको छ। मौसम पूर्वानुमान महाशाखाका अनुसार पछिल्लो बुलेटिनअनुसार देशका अधिकांश भागमा आज आंशिकदेखि सामान्य बदली रहनेछ।
कोशी, बागमती, कर्णाली र सुदूरपश्चिम प्रदेशका एक–दुई स्थानमा चट्याङसहित हल्का वर्षा भइरहेको छ। दिउँसोतिर देशभर मौसम आंशिकदेखि सामान्य बदली रहनेछ भने कोशी, बागमती, गण्डकी र लुम्बिनी प्रदेशका थोरै स्थानहरूमा तथा बाँकी भूभागका एक–दुई स्थानमा चट्याङसहित हल्कादेखि मध्यम वर्षाको सम्भावना रहेको जनाइएको छ।
त्यस्तै, उच्च पहाडी तथा हिमाली क्षेत्रका एक–दुई स्थानमा हल्का वर्षासहित हिमपातसमेत हुन सक्ने मौसमविद्को अनुमान छ।
आज रातिको लागि कोशी, मधेस, गण्डकी र लुम्बिनी प्रदेशका केही स्थानहरूमा चट्याङसहित हल्कादेखि मध्यम वर्षा हुने देखिएको छ भने कोशी र गण्डकी प्रदेशका एक–दुई स्थानमा भारी वर्षाको समेत सम्भावना रहेको जनाइएको छ।
महाशाखाले चट्याङसहित वर्षाको सम्भावना रहेका क्षेत्रहरूमा दैनिक जनजीवन, कृषि, स्वास्थ्य, सडक तथा हवाई यातायातमा प्रभाव पर्न सक्ने हुँदा आवश्यक सतर्कता अपनाउन अनुरोध गरेको छ। विशेषगरी कोशी, मधेस, बागमती, गण्डकी र लुम्बिनी प्रदेशका नागरिकहरूलाई सचेत रहन आग्रह गरिएको छ।