आजको मौसम : देशका पहाडी भू–भागमा वर्षाको सम्भावना 

काठमाडौं । नेपालमा आज (आइतबार) पनि पश्चिमी वायु, स्थानीय वायुसँगै बंगालको खाडी र अरब सागरबाट आएको जलवाष्पयुक्त हावाको आंशिक प्रभाव रहने जल तथा मौसम विज्ञान विभागले  जनाएकाे  छ।

विभागका अनुसार बंगालको खाडीको उत्तर–पश्चिम तथा दक्षिण–पश्चिम भू–भागमा मनसुन सक्रिय भइसकेको र त्यसले भारतका केही भूभाग हुँदै नेपालतर्फ पनि प्रवेश गर्ने तयारीमा रहेको  छ।

दिउँसो कोसी, मधेस र वाग्मती प्रदेशलगायत देशका पहाडी भू–भागमा आंशिकदेखि सामान्य बदलीको अवस्था रहनेछ। बाँकी भू–भागहरूमा मौसम सामान्यतया सफा रहने पूर्वानुमान गरिएको छ।

त्यसैगरी, कोसी र वाग्मती प्रदेशलगायतका पहाडी क्षेत्रका केही स्थानहरूमा र बाँकी भू–भागका एक–दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। उच्च–पहाडी तथा हिमाली क्षेत्रहरूमा भने एक–दुई स्थानमा हल्का वर्षा र हिमपात हुन सक्ने  विभागले जनाएकाे  छ।

रातिको समयमा पनि कोसी, मधेस र अन्य पहाडी क्षेत्रहरूमा आंशिकदेखि सामान्य बदली रहनेछ भने बाँकी भू–भागहरूमा मौसम सामान्यतया सफा हुने बताइएको छ।