सुदूरपश्चिमका पहाडी जिल्लाहरूमा भूकम्पको धक्का 

कञ्चनपुर । सुदूरपश्चिम प्रदेशका पहाडी जिल्लाहरूमा गएराति भूकम्पका धक्का महसुस गरिएको छ। भूकम्प मापन केन्द्र सुर्खेतका अनुसार बैतडी जिल्लाको सदरमुकाम खलङ्गा गढीलाई केन्द्रबिन्दु बनाएर राति १:४८ बजे ५.१ म्याग्निच्युडको भूकम्प गएको पुष्टि भएको छ। त्यसपछि राति २:०० बजेतिर ३.७ म्याग्निच्युडको परकम्प पनि गएको जनाइएको छ।

दुवै भूकम्पको केन्द्रबिन्दु बैतडीकै खलङ्गा गढी क्षेत्र नै रहेको छ। ती भूकम्पका धक्का बैतडीसहित दार्चुला, बझाङ, डडेलधुरा लगायतका पहाडी जिल्लाहरूमा व्यापक रूपमा महसुस गरिएको थियो।

बैतडीका प्रमुख जिल्ला अधिकारी दीर्घराज उपाध्यायले हालसम्म मानवीय वा भौतिक क्षतिको कुनै ठोस विवरण प्राप्त नभएको जानकारी दिनुभयो। साथै, सम्भावित क्षतिको विवरण संकलन गर्नका लागि सम्बन्धित निकायहरूलाई आवश्यक निर्देशन दिइएको उहाँले बताउनुभयो।

डडेलधुराका जिल्ला प्रशासन कार्यालयका सूचना अधिकारी द्वारिका ओझाका अनुसार पनि डडेलधुरामा अहिलेसम्म कुनै क्षतिको जानकारी आएको छैन।