आजकाे माैसम  

काठमाडौं । हाल देशभर पश्चिमी तथा स्थानीय वायुको प्रभाव देखिएको छ भने बङ्गालको खाडी र अरब सागरबाट भित्रिरहेको जलवाष्पयुक्त हावाले समेत आंशिक असर पारेको मौसम पूर्वानुमान महाशाखाले जनाएको छ।

महाशाखाका अनुसार आज दिउँसो देशका पहाडी क्षेत्रहरूमा आंशिकदेखि सामान्य बदली रहनेछ भने बाँकी अधिकांश भागमा मौसम सफा रहनेछ। साथै, पहाडी तथा हिमाली क्षेत्रका केही स्थानहरूमा मेघगर्जन, चट्याङसहित हल्कादेखि मध्यम वर्षाको सम्भावना रहेको छ। हिमाली क्षेत्रमा भने केही स्थानमा हल्का हिमपातको सम्भावना पनि छ।

यस्तै, आज राति पनि देशका पहाडी क्षेत्रमा आंशिक बदली रहनेछ भने अन्य भागहरूमा मौसम सफा रहनेछ। रातिको समयमा पहाडी भागका एक/दुई स्थानहरूमा मेघगर्जन र चट्याङसहित हल्कादेखि मध्यम वर्षा र हिमाली भागमा हल्का वर्षा तथा हिमपात हुनसक्ने सम्भावना रहेको महाशाखाले जनाएको छ।

सामान्य जनजीवन र कृषि कार्यमा मौसमको प्रभाव पर्ने भएकाले सतर्कता अपनाउन मौसमविद्हरूले सुझाव दिएका छन्।