- बैशाख २२, २०८२
- No Comment
- 62
फुटपाथ व्यवस्थापन अभियानमा वीरेन्द्रनगर

वीरेन्द्रनगर। वीरेन्द्रनगर नगरपालिकाले बजार क्षेत्रको सौन्दर्य र ट्राफिक व्यवस्थापनलाई ध्यानमा राख्दै फुटपाथ व्यवसाय नियन्त्रण र व्यवस्थापनको कार्यलाई तीव्रता दिएको छ। जथाभावी फुटपाथ व्यवसायले बजार क्षेत्र अस्तव्यस्त बनाएको, ट्राफिक जाम हुने, फोहोर बढ्ने र पैदलयात्रुहरूलाई समेत असहज हुने अवस्था देखिएको भन्दै नगरपालिकाले व्यवस्थापन अभियान थालेको हो।
नगर प्रमुख मोहनमाया ढकालको नेतृत्वमा ट्राफिक प्रहरी, व्यवसायी तथा सरोकारवाला निकायको सहभागितामा आइतबार बजार क्षेत्रको निरीक्षण र अनुगमन गरिएको छ। अनुगमनसँगै नगरपालिकाले ‘रेड जोन’, ‘एल्लो जोन’ र ‘ग्रीन जोन’का रूपमा क्षेत्रगत वर्गीकरण गर्दै फुटपाथ व्यवसायलाई नियमित गर्ने नीति अघि सारेको छ।
रेड जोनअन्तर्गत एयरपोर्ट चोकको तीनकुने क्षेत्र, बसपार्क गेट, मंगलगढी, बुलबुले गेट, एरिचोक, प्रदेश अस्पताल गेट, सरकारी कार्यालय आसपासका ५० मिटर क्षेत्र, रत्न राजमार्ग तथा हटिया लाइनको ५ मिटर सडक छेउ र बिरुवा लगाइएको तीन मिटर क्षेत्रबाहिर फुटपाथ व्यवसाय पूर्णतः निषेध गरिएको छ। यस्ता क्षेत्रमा फलफूल, तरकारी, खाजा, खुद्रा सामग्री, डोके र ठेलामा गरिने व्यवसाय गर्न नपाइने निर्णय गरिएको हो।
नगरपालिकाले रेड जोनमा व्यवसाय गरिरहेकाहरूको जीविकोपार्जनलाई समेत ख्याल राख्दै वैकल्पिक स्थान तोकेको छ। भानु पार्क आसपास, एमाले कार्यालयको पश्चिम, डाँडा स्कुल पूर्व–दक्षिण क्षेत्र, रेडियो भेरी पश्चिम क्षेत्र जस्ता ठाउँहरूमा व्यवसाय सराउने व्यवस्था गरिएको छ।
त्यस्तै, एल्लो जोनअन्तर्गत पिपल चौतारा, घण्टाघर दक्षिण, खेलकुद चोक जाने सडकको दक्षिणतर्फ र घण्टाघर–कालुञ्चोक बाहेकका क्षेत्रहरूमा तोकिएको समय अनुसार व्यवसाय सञ्चालन गर्न पाइने व्यवस्था गरिएको छ।
ग्रीन जोनका रूपमा बुलबुले गेटको उत्तरतर्फ विश्वविद्यालयको पर्खाल नजिक र जिल्ला प्रहरी कार्यालयपूर्वको श्रीकृष्ण माविसम्मको क्षेत्रमा कुनै पनि समयमा फुटपाथ व्यवसाय गर्न पाइने नगरपालिकाले जनाएको छ। अन्य क्षेत्रहरूमा गर्मी समयमा बिहान ६ देखि ९ र साँझ ४ देखि ७, सामान्य समयमा बिहान ५ देखि ८ बजेसम्म मात्र व्यवसाय गर्न पाइने छ।
नगरपालिकाले सबै फुटपाथ व्यवसायीहरूलाई सात दिनभित्र तोकिएको स्थानमा सर्न अनुरोध गरेको छ। नगर प्रमुख ढकालले अव्यवस्थित व्यापारले नगरको सौन्दर्य मात्र होइन, नागरिकको दैनिक जीवनमा पनि असर पुर्याइरहेको भन्दै दीर्घकालीन समाधानका लागि यो पहल गरिएको बताइन्। “व्यवस्थित शहर निर्माण हाम्रो साझा उद्देश्य हो,” उनले भनिन्, “व्यवसायको अधिकारसँगै जिम्मेवारी पनि आवश्यक हुन्छ।”