- चैत्र १३, २०८१
- No Comment
- 76
बझाङमा भ्रष्टाचार मुद्दा: पूर्व अध्यक्षसहित ७ जनाविरुद्ध कारबाही

बझाङ – अख्तियार दुरुपयोग अनुसन्धान आयोगले बझाङको खप्तडछान्ना गाउँपालिकाका तत्कालीन अध्यक्ष वर्कबहादुर रोकायासहित सात जनाविरुद्ध विशेष अदालतमा भ्रष्टाचार मुद्दा दायर गरेको छ। आयोगले बुधबार विशेष अदालतमा मुद्दा दर्ता गरेको हो।
आरोपितहरूमा तत्कालीन अध्यक्ष रोकायासहित वडाध्यक्ष भीमबहादुर रोकाया, निमित्त प्रमुख प्रशासकीय अधिकृत दीपककुमार रावल, इन्जिनियर सुरेन्द्रबहादुर खाती, प्राविधिक असिस्टेन्ट जनक थापा मगर, लेखापाल मदनराज जोशी र उपभोक्ता समिति अध्यक्ष शमशेर रोकाया रहेका छन्।
अख्तियारका अनुसार उनीहरूले सिम्लका घट्ट सिंचाई कुलो निर्माण योजनाको काम बिना नै भुक्तानी लिएर अनियमितता गरेका थिए। आर्थिक वर्ष २०७६/७७ मा कार्य सम्पन्न देखाइ आर्थिक वर्ष २०७७/७८ मा समेत रकम भुक्तानी लिएर भ्रष्टाचार गरेको आरोप लगाइएको छ।
अख्तियारले उनीहरुविरुद्ध जनही १४ लाख ८ हजार ८१७ रुपैयाँ बिगो कायम गरेको छ।