अमेरिकी सहयोग रकम र खर्चबारे श्वेतपत्र जारी गर्न सांसद खतिवडाको माग

नेपाली काँग्रेसका सांसद रामहरि खतिवडाले अमेरिकाले नेपाललाई उपलब्ध गराउँदै आएको सहयोग रकमको पारदर्शिता सुनिश्चित गर्न सरकारसँग श्वेतपत्र जारी गर्न माग गरेका छन् ।

प्रतिनिधि सभाको बिहीबारको बैठकमा बोल्दै सांसद खतिवडाले अमेरिकाबाट प्राप्त सहयोग रकम नेपालमा कति आएको छ, कसरी खर्च भएको छ र यसको पारदर्शिता कति छ भन्नेबारे स्पष्ट जानकारी आवश्यक रहेको बताएका हुन् ।

“यस्तो रकम कति नेपालमा आएको हो र क-कसले प्रयोग गरे? नेपाल सरकार वा अर्थ मन्त्रालयले यसबारे श्वेतपत्र जारी गर्नुपर्छ,” उनले संसदमा भने ।

खतिवडाले नेपालमा प्रवेश गरेका गैरसरकारी संस्था (एनजिओ) र अन्तर्राष्ट्रिय गैरसरकारी संस्था (आईएनजिओ) मार्फत आएको रकमको हिसाब-किताब पनि सार्वजनिक हुनुपर्ने माग गरे । उनले सहयोग रकम दुरुपयोग भएको भन्ने चर्चा पटक–पटक उठ्ने गरेको भन्दै नेपाल सरकारलाई यसबारे स्पष्ट जानकारी सार्वजनिक गर्न आग्रह गरे ।

उनले नेपाललाई बदनाम गर्ने गरी विभिन्न भ्रम फैलाउने कार्य भइरहेको दाबी गर्दै सत्यतथ्य बाहिर ल्याउन श्वेतपत्रको आवश्यकता रहेको बताए । सांसद खतिवडाको मागसँगै सरकारको औपचारिक प्रतिक्रिया आउन बाँकी छ ।