मोरङमा युवा–युवती एउटै रुखमा झुन्डिएको अवस्थामा मृत फेला

मोरङको पथरीशनिश्चरे–५ मा एक युवक र युवती एउटै रुखको हाँगामा झुन्डिएको अवस्थामा मृत फेला परेका छन्। मृतकहरूमा मोरङका अजय टुडू र झापाको गौरीगन्ज गाउँपालिका–२ की जाबुमुनी हस्दा रहेका छन्।

इलाका प्रहरी कार्यालय पथरीका अनुसार बक्राहा खोलाको किनारमा रहेको पिठारीको रुखमा नाइलनको डोरीको पासो लगाएर झुन्डिएको अवस्थामा उनीहरू फेला परेका हुन्। स्थानीयले देखेपछि प्रहरीलाई खबर गरेका थिए।

प्रहरी अनुसन्धानका अनुसार अजय र जाबुमुनी विवाहेत्तर सम्बन्धमा रहेको खुल्न आएको छ। अजयका श्रीमती र दुई छोरा छन् भने जाबुमुनीको विवाह मोरङकै कटहरी गाउँपालिकामा भएको थियो। उनका पति कान्छा टुडू वैदेशिक रोजगारीका लागि विदेशमा छन्।

घटनास्थल अजयको घरदेखि करिब एक किलोमिटर दक्षिण पर्छ। प्रहरीले घटनाका सबै पक्षलाई ख्याल गर्दै थप अनुसन्धान अगाडि बढाएको छ।