बैतडीमा बाघको आक्रमणबाट एक जना घाइते

बैतडीको मेलौली नगरपालिका–३ मा बाघको आक्रमणबाट एक जना घाइते भएका छन्। सोमबार बिहान कोला खोलामा बाख्रा चराउन गएका ३८ वर्षीय गणेशसिंह भाटलाई बाघले आक्रमण गरेको हो।

मेलौली–३ का वडाध्यक्ष गगनसिंह भाटका अनुसार बिहान करिब १०:३० बजे जंगल क्षेत्रमा गणेशसिंहमाथि बाघले हमला गरेको थियो। बाघको आक्रमणबाट ज्यान जोगाउन उनले आफूसँग रहेको हँसियाले बाघलाई प्रहार गर्दै भाग्न सफल भएका थिए।

घाइते गणेशसिंहलाई तत्काल प्राथमिक उपचारपछि थप उपचारका लागि पाटन प्राथमिक स्वास्थ्य केन्द्र पठाइएको छ।

बाघको आक्रमणपछि स्थानीयवासी त्रसित बनेका छन्। स्थिति नियन्त्रण गर्न र सुरक्षा सुनिश्चित गर्न उक्त क्षेत्रमा प्रहरी टोली परिचालन गरिएको जिल्ला प्रहरी कार्यालय बैतडीले जनाएको छ।